«Shabyt» festıvaline 10 eldiń úmitkerleri qatysady
ASTANA. QazAqparat - 5-8 qarasha aralyǵynda Astanada XXI «Shabyt» shyǵarmashyl jastar festıvali ótedi. Bıylǵy baıqaýǵa 10 memlekettiń ókili qatysady, dep habarlaıdy QazAqparat Elorda Infoǵa silteme jasap.
Qalalyq Mádenıet jáne sport basqarmasynyń málimetine sáıkes, bıylǵy baıqaýǵa qatysýǵa 345 ótinim túsken. Onyń 27-si - sheteldikterden, al 155-i elimizdiń túrli óńirlerindegi úmitkerler.
«Baıqaýǵa on memlekettiń Reseı, Ózbekstan, Ýkraına, Izraıl, Ázerbaıjan, Grýzııa, Belarýs, Bashqurtstan, Qyrǵyzstan jáne Qazaqstannyń ókilderi baq synaıdy», - delingen habarlamada.
Aıta keteıik, «Shabyt» shyǵarmashyl jastar festıvali bıyl 21-shi ret ótkiziledi.
Bıylǵy baıqaý «Klassıkalyq mýzyka», «Jýrnalıstıka», «Horeografııa», «Halyq mýzykasy», «Estradalyq vokal» bes atalym boıynsha ótedi.
Úmitkerler ár nomınatsııa boıynsha bas júlde men 1, 2 jáne 3-oryndy sarapqa salatyn bolady. Sondaı-aq kórnekti mádenıet jáne óner qaıratkerleriniń qurmetine taǵaıyndalǵan ataýly syılyqtar men dıplomdar bar.
Eń úzdik ónerpaz halyqaralyq festıvaldiń bas júldesi - QR Prezıdentiniń Kýbogyn ıelenedi.
Ár nomınatsııa boıynsha Gran-prı ıegerlerine - 350 myń teńge, birinshi oryn alǵandarǵa - 300 myń teńge, ekinshi oryn úshin - 250 myń teńge jáne úshinshi orynǵa - 200 myń teńge beriledi. Budan basqa, árbir sektsııa boıynsha uıymdastyrýshy - elordalyq Mádenıet jáne sport basqarmasy arnaıy syılyqtar men quny 80 myń teńgelik ataýly dıplomdar ázirledi.
Eske sala keteıik, «Shabyt» baǵdarlamasyna «Jýrnalıstıka» atalymy Astananyń 20 jyldyǵyn merekeleýge oraı alty jyldan soń qaıta engizilgendigi týraly jazǵan bolatynbyz. Aıta keterligi bul atalymda ataýly syılyq qazaq jazýshysy, jýrnalıst Sherhan Murtazany eske alýǵa arnalady.
