«Shabyt» festıvalinde Sherhan Murtaza atyndaǵy arnaýly syılyq tabystaldy
ASTANA. QazAqparat - HHІ halyqaralyq óner baıqaýynyń arnaýly júldesi «Aıqyn» respýblıkalyq qoǵamdyq-saıası gazetiniń tilshisine buıyrdy, dep habarlaıdy QazAqparat tilshisi.
«Baıqaýdyń sharty boıynsha birinshi kezeńde Astana týraly maqala jazyp jiberdim. Іrikteý kezeńinen súrinbeı ótip, ekinshi kezeńge joldama aldym. Ekinshi kezeńniń tapsyrmasy «Shabyt» festıvali týraly shyǵarma jazý. Odanda ótip nátıjesinde Sheraǵamyzdyń qurmetine arnalǵan syılyqty jeńip aldym, jas jýrnalıst retinde men úshin bul úlken jetistik. Jalpy Sher aǵamyzdyń shyǵarmashylyǵyn oqýshy kúnimnen janyma jaqyn tutamyn, onyń ishinde árıne «Qyzyl jebe» týyndysynyń orny bólek», - dedi jeńimpaz, «Aıqyn» respýblıkalyq gazetiniń tilshisi Dınara Tileýbek.
Aıta keteıik, «Shabyt» halyqaralyq festıvalinde araǵa birneshe jyldar salyp bıyl «Jýrnalıstıka» nomınatsııasy qaıta taǵaıyndaldy. Atalǵan sala boıynsha baıqaýǵa barlyq sany 48 jumys kelip tústi. Atalǵan sala boıynsha ádilqazylar alqasynyń sheshimimen Sherhan Murtazanyń qurmetine arnaýly syılyq taǵaıyndaldy. Al, jarystyń júldesine kelsek, basty syılyq - Prezıdent kobýgy, 10 Gran-prı, sondaı-aq 13 І, ІІ jáne ІІІ oryndar jáne 15 ataýly syılyq tabys etildi.
Halyqaralyq óner básekesinde jalpy sany 345 úmitker baǵyn synady, tek qana Astananyń ózinen 163 úmitker qatysty, odan bólek Ázerbaıjan, Belarýs, Bashqurtstan, Grýzııa, Izraıl, Qyrǵyzstan, Reseı, Ýkraına jáne Ózbekstan elderiniń ónerpazdary qatysty.
Buǵan deıin habarlaǵanymyzdaı, halyqaralyq «Shabyt» festıvaliniń Prezıdent kýbogin «Klassıkalyq mýzyka» nomınatsııasy boıynsha qatysqan elordalyq Islam Álıev ıelendi.
