«Shabyt» festıvalinde 644 qatysýshy bas júldeni sarapqa salady
ASTANA. QazAqparat - Qarashanyń 3-i men 8-i aralyǵynda Astanada XIX «Shabyt» halyqaralyq shyǵarmashyl jastar festıvali ótedi. Konkýrsqa qatysýǵa 644 adam ótinim bergen, dep habarlaıdy Astana ákimdiginiń resmı saıty.
Bıyl baıqaýǵa qatysýǵa nıet bildirgenderdiń ishinde 192-si «Beıneleý óneri» nomınatsııasynda, 154-i «Horeografııa» jáne 134-i «Halyq mýzykasy» nomınatsııasynda sheberlik baıqasady. Sońǵy nomınatsııada qatysýshylar dombyra, qobyz-prıma, qylqobyz, sherter-bas sherter men prıma dombyra aspaptarynda oınaıdy.
Basqa úsh nomınatsııa boıynsha 164 ótinim kelip túsken, sonyń ishinde «Úzdik ádebı shyǵarma» nomınatsııasynda - 45, «Klassıkalyq mýzyka» - 77 jáne «Estradalyq vokal» - 42.
Bıyl elordalyq jastar belsendilik tanytyp otyr, «Shabyt» festıvaline Astanadan 175 adam qatyspaq, al qalǵan ótinimderdi Qazaqstannyń basqa qalalarynan, sondaı-aq, shet memleketterden - Ázerbaıjan, Býrıatııa, Qytaı, Qyrǵyzstan, Reseı, Ózbekstan jáne Ýkraınadan keletin úmitkerler usynǵan.
Buryn habarlanǵandaı, konkýrsanttardy irikteý úsh týrmen ótedi. Qatysýshylardyń repertýary men árbir mýzykalyq aspapqa arnalǵan shyǵarmalardy uıymdastyrýshylar aldyn ala belgiledi. Árbir nomınatsııa boıynsha konkýrsty ótkizý baǵdarlamasy men ótkizý orny týraly tolyq aqparat www.shabyt.astana.kz saıtynda jarııalanǵan.
«Shabyt» halyqaralyq shyǵarmashyl jastar festıvali 19-shy ret ótkizilip otyr. Atalǵan shara óner álemindegi mańyzdy oqıǵa bolyp tabylady. Bul - jas daryndarǵa úlken sahnaǵa shyǵýǵa múmkindik beretin biregeı alań. Osy kúnge deıin festıvalǵa ónerdiń túrli janrlary boıynsha 10 myńnan astam adam qatysqan. Tursynbek Qabatov, Qalqaman Sarın, balet ártisteri Gúlfaırýz Qurmanǵojaeva men Áıgerim Beketaeva, QR eńbek sińirgen qaıratkeri opera ánshisi Aıgúl Nııazova jáne basqa da tanymal tulǵalar ár jyldary festıvalǵa qatysyp, Gran-prı ıegerleri atanǵan.
