«Shabyt» festıvalinde 238 bıshi saıysqa túsýde
ASTANA. QazAqparat - «Shabyt» festıvali aıasynda «Horeografııa» nomınatsııasy boıynsha qatysýshylar «Jastar» teatrynyń sahnasynda óner kórsetip jatyr. Qazaqstannyń óńirlerinen, sondaı-aq Ózbekstan men Qyrǵyzstannan 26 ujym men solıster, ıaǵnı 238 bıshi elordada halyq bılerin oryndaýda, dep habarlaıdy QazAqparat.
Mádenıet jáne sport basqarmasynyń málimetinshe, atalmysh nomınatsııa boıynsha qazylar alqasyna QR eńbek sińirgen qaıratkeri, «Naz» memlekettik bı teatrynyń kórkemdik jetekshisi jáne bas baletmeısteri Qadısha Aǵymbaeva jetekshilik etedi. Budan basqa, qazylar alqasynyń quramynda Sheshenstannyń halyq artısi, «Vaınah» ansambliniń kórkemdik jetekshisi Adnan Majıdov, Reseı Federatsııasynyń eńbek sińirgen artısi Nurlan Kametov, «Shalqyma» halyq bıi ansambliniń kórkemdik jetekshisi, mádenıet qaıratkeri Abdýrasýl Esekeev, sondaı-aq Qazaq ulttyq óner ýnıversıtetiniń professory Aıgúl Kúlbekova bar.
«Qazylar alqasynyń músheleriniń barlyǵy da buryn bıshi bolǵan. Árqaısysynyń horeografııada mol tájirıbesi bar. Biz ekinshi týrǵa 12 ujym men solısterdi tańdadyq. Qatysýshylardyń daıyndyq deńgeıleri ártúrli. Óte myqty bıshiler de bar. Biz de, qarapaıym kórermen de bıdi jaı tamashalap qana qoımaı, ony baǵalaý úshin ádemi bolǵanyn qalaımyz. Nómerlerdiń kostıýmderi de, mýzykasy da, horeografııasy da, bı barlyq jaǵynan úılesip tursa, ol nazardan tys qalmaıdy», - deıdi Qadısha Aǵymbaeva.
Horeograf Syrǵa Latypova «Shabyt» festıvaline «Shattyq» halyq bıi ansamblimen birge Qyrǵyzstannan kelgen eken. Qyrǵyzstannyń eńbek sińirgen mádenıet qaıratkeriniń shákirtteri festıvalde buryn da baǵyn synaǵan. Ár jyldary onyń tárbıelenýshileri «Shabyt» laýreattary atansa, búginde horeografııa óneriniń sheberleri jáne eńbek sińirgen pedagogtar atandy.
«Bir jyldary «Shabytta» baǵyn synap, júldeli oryndar alǵan shákirtterim, búginde mádenıet jáne bilim ozattary. «Shabyt» olardy óner jolyna jeteledi, olardyń kásipqoı retinde qalyptasýyna serpin berdi. Respýblıkada jastarǵa arnalǵan osyndaı baıqaýlar men festıvalderdiń ótkiziletini jaqsy. Sebebi, bul jastar shyǵarmashylyqtaǵy maıtalmandardy almastyrady, biz olardy daıyndaımyz, jańa esimderdi ashamyz, urpaqtar sabaqtastyǵy bar. Bıyl 16-17 jastaǵy 17 bıshi ákeldik. Árbir kompozıtsııany oryndaǵan kezde meniń shákirtterim ózderiniń derbestigin, ereksheligin kórsetýge tyrysty. Biz oıymyzdy iske asyrdyq dep oılaımyn(, - dedi qyrǵyzstandyq ansambldiń jetekshisi.
Eske sala ketsek, osymen 21-shi ret ótkizilip otyrǵan shyǵarmashyl jastardyń festıvaline bıyl 10 memleketten 345 úmitker qatysýda. 5-9 qarasha aralyǵynda ótetin óner básekesinde daryndy jastar «Klassıkalyq mýzyka», «Halyq mýzykasy», «Estradalyq vokal», «Horeografııa» jáne «Jýrnalıstıka» nomınatsııalary boıynsha baq synaıdy.
