«Shabyt-2010» baıqaý-syılyǵynyń alǵashqy ıegerleri anyqtaldy
ANA. 29 jeltoqsan. QazAqparat /Jasulan Amanbaıuly/ - Búgin Astanada eldiń birqatar shyǵarmashyl jastary jáne mádenıet salasyn qoldap júrgen otandyq uıymdar tuńǵysh ret uıymdastyrylǵan táýelsiz «Shabyt-2010» baıqaý-syılyǵymen marapattaldy.
«Shabyt» qoǵamdyq qory atalmysh syılyqty úzdik jetistikterimen kózge túsken shyǵarmashyl jastarǵa, sonymen qatar olarǵa demeýshilik jasap, mádenıet pen óner jolynda aıanbaǵan tulǵalarǵa, uıymdarǵa tabys etedi.
Qor 2009 jyly XII halyqaralyq «Shabyt» shyǵarmashyl jastar festıvaliniń uıymdastyrýshylary men qatysýshylarynyń bastamasymen, mádenıettegi jas talanttardyń alǵashqy shyǵarmashyl qadamdaryna qoldaý kórsetý úshin qurylǵan bolatyn.
Bıyl atalǵan syılyqty tuńǵysh ret qazaqstandyq ónerpazdar ıelenip otyr.
«Baıqaýdyń irikteý kezeńinde myqtylardy tańdaýda zertteý jáne áleýmettik saýaldardy júrgizý ádisi qoldanyldy. Zertteý barysy 1 qarashadan 1 jeltoqsanǵa deıin ótkizilip, ondaǵy málimetter 15 kún boıy óńdeldi. Sonan soń Qazaqstannyń beldi qaıratkerlerinen quralǵan táýelsiz ádilqazylar toby eń úzdikterdi tańdady», - deıdi «Shabyt» qoǵamdyq qorynyń atqarýshy dırektory Talant Tólebekov.
Jeńimpazdar úsh atalym boıynsha anyqtaldy. Budan bólek, «Mádenıet salasyna sińirgen eńbegi men QR shyǵarmashyl jastaryna kórsetken qoldaýy úshin» arnaıy atalymy bekitilip, oǵan QR Mádenıet mınıstri Muhtar Qul-Muhammed laıyq dep tabyldy.
Bıyl «2010 jyly Mádenıet jáne óner salasyndaǵy jetistigi úshin» atalymynda elordadaǵy fılarmonııanyń horeografy Ádil Erkinbaev, belgili balet bıshisi Gúlfaırýz Qurmanqojaeva, ánshi Qaırat Túntekov, jas rejısser Qanaǵat Mustafın, aktrısa Qarlyǵash Muhamedjanova jáne tsırk ártisi Murat Muturǵanov úzdik dep tanyldy.
«2010 jyly shyǵarmashyl jastardy qoldaýy úshin» syılyǵyna Aıman Musaqojaeva, Arystanbek Muhamedıuly, Baıan Esentaeva, «Kazahstanskaıa pravda» gazeti, «Qazaq Aqparat agenttigi» UK» AQ, «Elorda Tynysy» RADIO TENGRI JShS, «TV Media Advertising Agency» Hit TV JShS ıe boldy.
«2010 jyly Mádenıet pen óner salasynda sapaly qyzmet kórsetkeni úshin» atalymy boıynsha Á.Qasteev atyndaǵy óner murajaıy, Jambyl atyndaǵy Qazaq memlekettik fılarmonııasy, K. Baıseıitova atyndaǵy opera jáne balet teatry, «Qulanshy» qazirgi zamanǵy óner ortalyǵy, «Qazaq áýenderi» AQ, «Kınopark» kompanııasy syılyq aldy.
