Shabýyl saldarynan Iranda 201 adam qaza tapty
ASTANA. KAZINFORM — Jergilikti buqaralyq aqparat quraldary Qyzyl Jarty Aı qoǵamyna silteme jasap, Iranda 201 adamnyń qaza tapqanyn, taǵy 747 adamnyń jaralanǵanyn málimdedi, dep habarlaıdy Kazinform.
Soqqylar Irannyń 24 provıntsııasyn qamtydy
Reuters agenttiginiń jazýynsha, AQSh pen Izraıldiń shabýyldary Islam Respýblıkasynyń 32 provıntsııasynyń 24-ine áser etken.
Qurbandardyń arasynda Irannyń ońtústigindegi bastaýysh qyzdar mektebine jasalǵan shabýyldan kóz jumǵandar da bar. Sońǵy málimetter boıynsha, atalǵan shabýyldan 85 adam qaza tapqan.
AQSh áskerı qyzmetshileri arasynda shyǵyn joq — United States Central Command
AQSh-tyń Ortalyq qolbasshylyǵy júzdegen ırandyq soqqynyń toıtarylǵanyn málimdedi.
— AQSh pen seriktesteriniń alǵashqy soqqysynan keıin Ortalyq qolbasshylyq kúshteri Irannyń júzdegen zymyrandyq jáne ushqyshsyz shabýylynyń betin qaıtardy, — delingen habarlamada.
Qolbasshylyq sondaı-aq amerıkalyq áskerı qyzmetshiler arasynda shyǵyn bolmaǵanyn málimdedi.
— AQSh nysandaryna keltirilgen zalal az boldy jáne olardyń jumysyna áser etken joq, — dep kórsetilgen málimdemede.
Izraıl shamamen 200 joıǵysh ushaqty iske qosty
Izraıl áskerı málimetine sáıkes, shamamen 200 joıǵysh ushaq Irannyń batysy men ortalyǵyndaǵy zymyran keshenderi men áýe qorǵanys júıelerine soqqy jasaǵan.
Bul operatsııa Izraıl áskerı-áýe kúshteri tarıhyndaǵy «eń aýqymdy áskerı ushý» dep atalǵan.
Ushaqtar júzdegen oq-dári tastap, bir mezette shamamen 500 nysanaǵa soqqy bergeni habarlandy.
Olardyń qatarynda Irannyń ártúrli aımaqtaryndaǵy áýe shabýylyna qarsy qorǵanys júıeleri men zymyran ushyrý qondyrǵylary bar, dep jazady Al Jazeera.
— Qorǵanys júıelerine jasalǵan soqqylar Izraıl áskerı-áýe kúshteriniń Iran aýmaǵyndaǵy áýe ústemdigin keńeıtýge jáne ırandyq rejımniń shabýyl múmkindikterin, atap aıtqanda Irannyń batysyndaǵy zymyran ushyrý pozıtsııalaryn edáýir álsiretýge múmkindik berdi, — delingen Izraıl armııasynyń málimdemesinde.
Buǵan deıin buqaralyq aqparat quraldary Irannyń joǵarǵy jetekshisiniń rezıdentsııasyna zaqym kelgenin habarlaǵan edi.