Sh.Ýálıhanov atyndaǵy KMÝ-de 2 jataqhana salynady-Aqmola oblysy
KÓKShETAÝ. QazAqparat - Kókshetaýda Elbasy Nursultan Nazarbaevtyń 5 áleýmettik basymdyǵyn talqylaý boıynsha dóńgelek ústel uıymdastyryldy, dep habarlaıdy QazAqparat tilshisi.
Memlekettik organdardyń basshylary, saıası partııalar men memlekettik emes uıymdardyń, qoǵamdyq birlestikter jáne BAQ ókilderi qatysqan jıynda Elbasynyń 5 áleýmettik basymdyǵynda aıtylǵan árbir qazaqstandyqtyń ál-aýqatyn arttyrý baǵytynda alǵa qoıylǵan mindetter sóz boldy.
«Qazaqstannyń turǵyn úı qurylys jınaq banki» AQ bólim basshysy Áset Boranbaevtyń aıtýynsha, aǵymdaǵy jyly óńirde «Nurly jer» baǵdarlamasy sheńberinde turǵyn úı qurylysyn jandandyrý josparda bar.
«Nurly jer» baǵdarlamasy boıynsha óńirde bıylǵy jylǵa 16 jaldamaly, 12 nesıelik turǵyn úı salý kózdelgen. Bul byltyrǵy jylmen salystyrǵanda 2,5 paıyzǵa artyq. Oǵan qosa jekeleı úı salý úshin 2400 jer telimi ınjenerlik ınfraqurylymmen qamtamasyz etiledi», dedi Áset Boranbaev óz sózinde.
Al, Sh.Ýálıhanov atyndaǵy Kókshetaý memlekettik ýnıversıtetiniń rektory Ábdimútálip Ábjapparov ýnıversıtet stýdentteri úshin 1000 oryndyq 2 jataqhana salynatyn atap ótti.
Sonymen qatar, jıynda ardagerler men múgedekterge arnalǵan emhananyń bas dárigeri Baǵıla Zakrına, oblystyq energetıka jáne turǵyn úı - kommýnaldyq sharýashylyǵy basqarmasynyń ókili Jasqaırat Sadyqovtyń medıtsına qyzmetkerlerine tıisti eńbekaqysyn tóleý, tómen aılyq alatyn adamdarǵa salyqtyń jeńildetilýi jáne eldi mekenderdi gazdandyrý taqyrybynda pikirleri tyńdaldy.
Osy rette, oblystyq ishki saıasat basqarmasynyń mindetin atqarýshy Gúlmıra Kárimova atalmysh áleýmettik basymdyqtardy halyqqa jetkizý úshin túsindirý jumystarynyń keń aýqymda júrgizile beretin atap ótti.
