Sh. Orazbaevanyń «Bastaý» týyndysy 66-shy Kann halyqaralyq kınofestıvaliniń baǵdarlamasyna endi

Krýazett jaǵalaýyna názik jan týyndynyń prodıýseri Madııar Qasymovpen birge attanbaq. Atalmysh týyndyda bas róldi «Shal» fılminiń juldyzy somdaǵan. Bul týraly «Ekspress-K» gazeti №77 sanynda «Stıven Spılbergti tańǵaldyrý» maqalasynda baıandaǵan.

Bıylǵy jyly bedeldi forýmnyń qazylar alqasyna Stıven Spılberg tóraǵalyq etpek. Baıqaýǵa qatysýshylardyń sheberligin golıvýd ártisi Nıkol Kıdman, taıvandyq rejısser Eng Lı jáne álemdik sınematograftyń basqa da juldyzdary saraptaıdy. Festıval shymyldyǵy Baza Lýrmannyń «Uly Getsbı» týyndysymen ashylmaq. 15-26 mamyr aralyǵynda ótetin eleýli sharaǵa qazaqstandyqtar da atsalysady. Madııar Qasymovtyń aıtýynsha, naqyl túrindegi «Bastaý» fılmi ataqty Sızıf týraly ejelgi grek ańyzynyń allıýzııasy ispetti. Onyń bas qaharmany qý shóldi sýǵa qanyqtyrý úshin ondaǵan shaqyrymdy velosıpedpen baǵyndyrady. Bir qaraǵanda onyń is-áreketiniń máni joq sekildi, biraq shyntýaıtyna kelgende olaı bolmaı shyǵady.

«Fılm Almaty oblysynda túsirildi, - deıdi Madııar. - Bas róldi somdaǵan ártisti aptap ystyq álekke saldy».

Shárıpa men Madııar Júrgenov atyndaǵy Qazaq Ulttyq óner akademııasyna qarasty joǵarǵy rejısserlyq kýrstardyń stýdentteri. Olarǵa «Lýnnyı papa», bas róldi Per Rıshar somdaǵan «1 000 ı 1 retsept vlıýblennogo kýlınara», Eldar Rıazanovtyń «Andersen: jızn bez lıýbvı» fılmderiniń stsenarııleri boıynsha ataqty, tanymal grýzııalyq rejısser jáne stsenarıst Iraklıı Kvırıkadze dáris oqıdy.