Sh. Qaldaıaqovtyń shyǵarmashylyǵyna arnalǵan «Meniń Qazaqstanym!» atty halyqaralyq án festıvali ótkiziledi
ASTANA. 12 qyrkúıek. QazAqparat. Qazaqtyń án ónerin damytý, qazaq valsiniń koroli Shámshi Qaldaıaqovtyń mol murasyn halyq arasynda oryndap júrgen daryndy jastardyń shyǵarmashylyǵyna qoldaý kórsetý,
qazaq estradasynyń mańdaıaldy sheberleriniń ónerin keıingi jas býynǵa úlgi etý, sondaı-aq qazaqtyń daryndy kompozıtorynyń shyǵarmalaryn ulyqtap, buqara halyqqa nasıhattaý maqsatynda Qazaqstan Respýblıkasynyń Mádenıet mınıstrligi Shámshi Qaldaıaqovtyń shyǵarmashylyǵyna arnalǵan «Meniń Qazaqstanym!» atty Halyqaralyq án festıvalin ótkizedi.
Festıvaldiń mindetterine Sh. Qaldaıaqovtyń shyǵarmashylyǵyn keńinen nasıhattap, urpaqtan-urpaqqa jetkizý; án óneriniń eń jaqsy dástúrleri men jetistikterin jańǵyrtý, damytý jáne nasıhattaý; halyqtyń mádenı demalysy men estetıkalyq tárbıesin, rýhanı jáne mádenı qundylyqtarmen almasýdy uıymdastyrý; talantty, ózindik ereksheligi bar oryndaýshylardy qoldaý; jastardyń estetıkalyq jáne patrıottyq turǵyda tárbıelenýine, ulttyq jáne álemdik mádenıet qundylyqtaryn qurmetteýine yqpal etý jatady.
Festıvaldiń irikteý kezeńi Astana qalasynda 2011 jylǵy 14 qyrkúıek kúni saǵat 11.00-de Prezıdenttik mádenıet ortalyǵynda ótedi. Іrikteý kezeńinde oblystardyń, Astana men Almaty qalalarynyń mádenıet basqarmalarynyń, sondaı-aq sheteldik mádenıet uıymdarynyń usynysy boıynsha jergilikti jerlerde ótkizilgen Sh. Qaldaıaqov atyndaǵy án baıqaýlarynyń jeńimpazdary qatysyp, óner kórsetedi.
Al festıval sońynan bolatyn Gala-kontsert 16 qyrkúıek kúni saǵat 19.00-de «Qazaqstan» ortalyq kontsert zalynda ótedi. Kontsertke Qazaqstannyń halyq ártisteri Bıbigúl Tólegenova, Nurǵalı Núsipjanov, Eskendir Hasanǵalıev, Nurjamal Úsenbaeva, tanymal estrada juldyzdary Altynaı Jorabaeva, «Qońyr» toby, t.b. qatysady.
14 qyrkúıekte saǵat 10.00-de Prezıdenttik mádenıet ortalyǵy kontsert zalynyń foıesinde qazylar alqasynyń qatysýymen BAQ úshin baspasóz máslıhaty ótedi.
Qazaqtyń án patshasy Shámshi Qaldaıaqov shyǵarmashylyǵynyń qundylyǵy eshqashan kemimek emes. Ultynyń janyn terbetip, sezimin oıatqan ataqty kompozıtor esimi jyl jyljyǵan saıyn el esinde jattalyp, máńgilik ómir súrmek.
