Sh.Qaldaıaqov qazaq estradasy ónerin, osy zamanǵy qazaq mýzykasyn jańa bıikke kótergen adam - M.Qul-Muhammed
ASTANA. 11 qarasha. QazAqparat /Gúlmıra Álıakparova/ - Búgin Astanada Shámshi Qaldaıaqov atyndaǵy «Meniń Qazaqstanym!» halyqaralyq án festıvali bastaldy.
Festıvaldi saltanatty túrde QR Mádenıet mınıstri Muhtar Qul-Muhammed ashty. Mınıstrdiń aıtýynsha, HH ǵasyrdy qazaq ádebıeti men mádenıetiniń altyn ǵasyry dep aıtýǵa bolady. Eldi bostandyq úshin kúreske shaqyryp, táýelsizdik jónindegi ıdeıalardyń uryǵyn sepken alashtyqtar 37-jyldyń qandy qýǵyn-súrginine ushyraǵannan keıin, qazaqtyń bul eki qazynasynyń shamy sóne bastaǵan sekildi bolǵanymen 50-jyldary ol qaıta kóterilip, 60- jyldary tamasha esimderdi tanyta otyryp qaıta túledi.
«Sondaı talantty tulǵalardyń biri Sh.Qaldaıaqov edi. Shámshi jalǵyz kelgen joq, onymen birge sol kezdegi qazaq mádenıeti men ádebıetiniń úlken renessansty tulǵalary keldi. Shámshi aǵamyz qazaq estradasy ónerin, osy zamanǵy qazaq mýzykasyn jańa bıikke kótergen adam boldy. Qaldaıaqovtyń mýzykasyn M.Áýezov ta tyńdap ótken», dedi ol.
Mınıstr atap kórsetkendeı, ókinishke qaraı, «Án aǵamyzdyń» talanty keńes zamanynda óz dárejesinde baǵalanǵan joq. Biraq el táýelsizdigin alǵan alǵashqy jyly Elbasy N.Nazarbaevtyń Jarlyǵymen Sh.Qaldaıaqovqa «Qazaqstannyń halyq ártisi» ataǵy berildi. Al taıaýda, 2010 jyldyń qazanynda memlekettik án uranymyzdyń qos avtory J.Nájimedenov pen Sh.Qaldaıaqov Memlekettik syılyqtyń ıegerleri atandy.
Festıvalǵa Qazaqstanmen birge Qytaı, Reseı, Tájikstan, Ózbekstan men Mońǵolııadan barlyǵy 20 ánshi qatysýda. Olar eki kún boıy Shámshiniń ánderin shyrqap, ónerlerin ortaǵa salatyn bolady. Olardyń ónerin kúmis kómeı ánshimiz Bıbigúl Tólegenova bastaǵan qazaq estradasynyń maıtalmandary baǵalaıtyn bolady.
Án merekesiniń úshinshi kúninde B.Tólegenova, N.Úsenbaeva, N.Núsipjanov, A.Qorazbaev, B.Sámedınova, Q.Ábildına, R.Stamǵazıev, M.Arynbaev, M.Sádýaqasova jáne taǵy da basqa qazaq óneri sheberleriniń gala-kontserti ótip, jeńimpazdardyń esimderi jarııalanady.
