Sezimmen tanylatyn óner: Oralda kórý qabileti shekteýli jandarǵa arnalǵan fotokórme ótedi
ASTANA. KAZINFORM - Canon kompanııasy ÓzgeEpic kreatıv habynyń qoldaýymen Oral qalasynda «Kórinbeıtin álem» atty bederli fotokórme usynady.
Dúnıejúzilik densaýlyq saqtaý uıymynyń málimeti boıynsha, álemde 2,2 mıllıardtan astam adam ártúrli kórý kemshilikterimen ómir súredi. Al olardyń basym kópshiligi úshin fotografııa, vızýal álemi múldem túsiniksiz. Qazaqstanda shamamen 160 myń adam osyndaı shekteýlermen ómir súrýde. «Kózge kórinbes álem» kórmesi kórý qabiletine qaramastan, ónerge qol jetkizýdi maqsat etetin adamdar úshin kedergilerdi joıýǵa umtylady.
Kórmeniń maqsaty – óner jáne jańa tehnologııalardyń kómegimen kórmeı-aq, sezý jáne estý qabileti arqyly qabyldaýǵa bolatyn jańa tanym keńistigin qalyptastyrý. Ekspozıtsııada tanymal fotosýretshilerdiń bederli sýretteri, dybystyq sıpattamalary jáne Braıl qarpimen jazylǵan mátinder usynylady. Bul – kórý qabileti shekteýli jandardyń beıneni seziný arqyly qabyldaýyna múmkindik beredi.
Bul ınklıýzıvti qoǵamǵa qaraı mańyzdy qadam jasaı otyryp, zamanaýı óner men tehnologııalar arqyly shekaralardy joıýǵa umtylatyn, kórý qabileti qalypty adamdar men kórý qabileti shekteýli jandardy biriktiretin erekshe alań.
- Canon kompanııasy sýretterdiń álemdi ózgertýge qabiletti ekenine senedi, al «Kózge kórinbes álem» kórmesi ınnovatsııalar arqyly ónerdi bárine qoljetimdi etýge bolatyndyǵynyń jarqyn úlgisi. Zamanaýı baspa tehnologııalary beınelerdi taktıldi túrde «kórýge» múmkindik beredi, bul kórý qabileti nashar adamdar úshin qabyldaýdyń jańa kókjıekterin ashady, – dedi Canon kompanııasynyń ókili.
Kózge kórinbeıtin álem – ónerdi seziný tásilderin keńeıtý arqyly ınklıýzıvti qoǵam qurýǵa qosqan úlken joba.
- Bul kórme – bizdiń qoǵamdaǵy árbir adamnyń ónerdi sezinip, onyń qýatyn qabyldaýyna múmkindik beretin mańyzdy qadam. ÓzgeEpic habyndaǵy jumysymyzdyń ózegi de – kreatıvti sheshimder arqyly barshaǵa ortaq, qoljetimdi orta qalyptastyrý. Canon kompanııasymen birlesip qolǵa alynǵan bul joba — kreatıv pen tehnologııanyń adam janyna jol taba alatynyn kórsetetin jarqyn mysal. Kórme Oral qalasynda ornalasqan keńistigimizde bir aı boıy qala qonaqtary men turǵyndarynyń nazaryna usynylady, – dep atap ótti ÓzgeEpic kreatıv habynyń negizin qalaýshy Toǵjan Qurmanjanqyzy.