Seıtmetov teatrynyń ártisteri muz aıdynynda qoıylym kórsetedi
TÚRKІSTAN. KAZINFORM- Biregeı jobaǵa aınalatyn mundaı dýmandy elimizdegi teatr akterlary buryn-sońdy jasamaǵan.
Teatr basshysy Arman Alıevtiń aıtýynsha, muz aıdynynda ótetin teatrlandyrylǵan dýmandy qoıylym jyl sońynda kórermen nazaryna usynylady. Jaz aılarynda teatr ártisteri muz ústinde konkıdi erkin tebýdi meńgerip, birneshe aı boıy daıyndyq júrgizedi.
«Qoıylym 20 jeltoqsan men 13 qańtar aralyǵynda kópshiliktiń nazaryna usynylady. Endi akterlar qarym-qabiletin shyńdap, teatr sahnasymen qatar, muz aıdynynda baǵyn synap kóredi. Búgin olarǵa muzda syrǵanaý ońaıǵa soqpady. Biraqtan nátıjesi qýantarlyq bolatynyna senimdi. Aldaǵy aıdan bastap muz ústinde tolyq quram daıyndyqqa kirisedi», - dedi Arman Alıev.
Al, keshen basshysy Danııar Isabaev bul kelisimniń eki tarapqa da úlken septigi tıetinin baıandady.
«Biz úshin tıimdi joba. Sondyqtan usynysty birden qabyl aldyq. Muzdaǵy syrǵanaý mádenıeti elimizde endi qalyptastyp kele jatyr. Biz jattyǵýlardan bólek, arnaıy túski ýaqytta teatr ártisteriniń tyńǵylyqty daıyndyq júrgizýine kelisim berdik. Bul qala turǵyndaryn ǵana emes, kelýshi týrısterdi de qyzyqtyratyn joba bolady dep oılaımyn», - dedi Danııar Isabaev.
