Seısmologtar Nepalda taǵy jer silkinisteri bolýy múmkin degen boljam jasaýda
ASTANA. QazAqparat - Nepal, Úndistan jáne Qytaıda taǵy da jer silkinisteri oryn alýy múmkin, degen málimdeme jasady AQSh-tyń Stenford ýnıversıtetiniń seısmolog-ǵalymdary. Olar mundaı tujyrymǵa Gımalaı aımaqtaryn zerttep baıqaǵan soń kelip otyr, dep habarlaıdy Newsland.
Ǵalymdardyń pikirinshe, sol mańda úndilik jer qatpary Azııalyq jer qatparymen soqtyǵysyp, taǵy da qýatty jer silkinisterin týdyrýy múmkin. Aıta keteıik, oryn alǵan tabıǵı apattyń bolatynyn mamandar 2001 jyly-aq boljaǵan, biraq onyń naqty qaı ýaqytta bastalatynyn eshkim dóp basyp aıta almady.
Esterińizge sala keteıik, Nepalda terbelisi 7,9 ballǵa jetken joıqyn zilzala 25 sáýir kúni tańerteń boldy. Onyń kindigi el astanasy Katmandýdan soltústik-batysqa qaraı 82 shaqyrym jerde, 15 shaqyrym tereńdikte boldy. Budan keıin kúndiz Nepalda birneshe jerasty dúmpýi bolyp, onyń eń qýattysynyń kúshi 6,7 ballǵa jetti. Jer silkinisiniń qurbandary sany qazirgi tańda 7 myń adamnan asty, 14397 adam jaraqattanǵan.
