Seısmologııa ınstıtýtynyń Ǵylym mınıstrligine qaıtarylýyna qarsy emespiz — Saıasat Nurbek
ASTANA. KAZINFORM — Búgin Májilistiń jalpy otyrysynda QR Ǵylym jáne joǵary bilim mınıstri Saıasat Nurbek Seısmologııa ınstıtýtyn ózi basqaryp otyrǵan vedomstvoǵa qaıtarý múmkindigine pikir bildirdi.
«Dúısenbi kúni Almatyda jer silkindi. Jaqynda Seısmologııa ınstıtýtynyń ǵylymı qyzmetkerlerimen kezdestim. Іs júzinde atalǵan ınstıtýt qyzmetkerleri beısharanyń kúnin keship otyr. Eshqandaı ǵylymı jobalary qabyldanbaǵan. Jobalaryn mınıstrlikke joldasa da, olardy keri qaıtaryp jatyr, ıaǵnı qarjylandyrýdy qysqartyp tastaǵan. Qazir Seısmologııa ınstıtýty Tótenshe jaǵdaılar mınıstrliginiń qaramaǵynda. Seısmolog ǵalymdar ınstıtýtty Ǵylym mınıstrligine qaıtarý kerek ekenin aıtyp otyr. Osyǵan ne aıtasyz?», — dep surady depýtat Baqytjan Bazarbek.
Óz kezeginde Ǵylym jáne joǵary bilim mınıstri Saıasat Nurbek kezinde birqatar ınstıtýt salalyq mınıstrlikterdiń quramyna berilgenin eske saldy.
«Seısmologııa ınstıtýty da Tótenshe jaǵdaılar mınıstrliginde. Olarda qazir tolyqqandy qarjylandyrý bolmaǵany ókinishti. Sonymen qatar, bizdiń mınıstrlik te olardyń ishki protsedýralaryn qoldaı almaıdy. Sondyqtan atalǵan ınstıtýt bizge qaıtarylsa, qarsy bolmaımyz. Biraq bıyl qomaqty grantty Seısmologııa ınstıtýtyna bólip otyrmyz, ıaǵnı 3,5 mlrd teńge somasynda. Qazir olardyń barlyq ótinimin pysyqtap, Úkimet janyndaǵy komıssııanyń qaraýyna shyǵaryp otyrmyz», — dedi mınıstr.
Eske salsaq, byltyr «Seısmologııa ınstıtýty» JShS men «Seısmologııalyq tájirıbelik-ádistemelik ekspedıtsııa» JShS biriktirý jolymen jarǵylyq kapıtalynda memlekettiń 100 paıyz qatysýymen Seısmologııalyq baqylaýlar men zertteýler ulttyq ǵylymı ortalyǵy jaýapkershiligi shekteýli seriktestigi bolyp qaıta qurylǵan edi.
