Seısmologııa ınstıtýty TJM-dan Ǵylym mınıstrligine óte me

ASTANA. KAZINFORM – Tótenshe jaǵdaılar mınıstri Shyńǵys Árinov Seısmologııa ınstıtýtynyń keleshegi týraly pikir bildirdi. 

Azamattyq qorǵaý salasyndaǵy zańnamany jetildiretin qujatty talqylaý kezinde depýtat Baqytjan Bazarbek Tótenshe jaǵdaılar mınıstriniń nazaryn Seısmologııa ınstıtýtynyń qazirgi ahýalyna aýdartty.

- Seısmologııa ınstıtýtyn Tótenshe jaǵdaılar komıtetiniń «balasy» deýge bolady. Sol «balańyz» qazir qamqorlyqqa zárý, - dep bastaǵan depýtat sala mamandarynyń ǵylymı mártebesin qaıtarý týraly bastama sıyrquıymshaqtanyp bara jatyr degen ýáj keltirdi.

Baqytjan Bazarbek ózi aralap shyqqan seısmologııalyq stansalardyń ishinde Medeýdegisi ǵana talapqa saı bolǵanyn, qalǵandary metall úıindisinen aınalǵanyn atap ótti.

- Ata-ana balasyna durys qaramasa, quqyǵynan aıyrylady. Sol sııaqty Seısmologııa ınstıtýtyn kútip ustaı almaıtyn bolsańyzdar, Ǵylym jáne joǵary bilim mınıstrligine ótkizip berýge daıynsyz ba? - dep surady ol.

Shyńǵys Árinov allegorııaǵa allegorııamen jaýap berdi.

- Ata-ana iltıpatymen salystyryp aıtsaq, qamqorlyq jetpeı jatqan tek Seısmologııa ınstıtýty ǵana emes. Ókinishke qaraı, 11-12 aıdyń ishinde bir-aq sátte tártip ornatý múmkin bolmady. Jańartý, kemshilikti túzeý kezeń-kezeńmen júrip jatyr. Ǵylym mınıstrligimen birge bul máseleni sheshtik. Úkimet aıqyn ustanymyn aıtty. Instıtýt TJM quramynda qalatyn boldy. Memleket basshysynyń tapsyrmasy boıynsha aqsha bólingen. Qazir jobalaý-smetalyq qujattamasy jasalyp jatyr. Instıtýttyń bas ǵımaratynda bıyl jazda jóndeý bastalady. 150 seısmologııalyq stansanyń jaıyna kelsek, jaǵdaıy shynymen aıanyshty. Kapsýla túrindegi úıge kóshiremiz be degen bir nusqa bar. Ne bolsa da, bir órkenıetti jolyn tabamyz. Qyzmetkerler qolaıly jumys isteıtindeı jumys isteımiz. Seısmologtardy áleýmettik qoldaý jaǵyna kelsek, bıyl birinshi ret syıaqy, grant alyp, kiris kórsetti. Men kelgenge deıin kirisinen shyǵysy kóp bolatyn, - dedi mınıstr.

Aıta keteıik, Májilistiń jalpy otyrysynda QR Ǵylym jáne joǵary bilim mınıstri Saıasat Nurbek Seısmologııa ınstıtýtyn ózi basqaryp otyrǵan vedomstvoǵa qaıtarý múmkindigine pikir bildirdi.