Seısmologııa ınstıtýty Ǵylym mınıstrligine berilýi múmkin be
ALMATY. KAZINFORM – Búgingi kúni Seısmologııalyq baıqaý jáne zertteý ulttyq ǵylymı ortalyǵy (seısmologııa ınstıtýty) Tótenshe jaǵdaılar mınıstrliginiń qaramaǵyna alynǵan.
Byltyr QR Ǵylym jáne joǵary bilim mınıstri Saıasat Nurbek seısmologııa ınstıtýtyn ózi basqaryp otyrǵan vedomstvoǵa qaıtarýǵa qarsy emes ekenin aıtty.
Osy oraıda, Kazinform tilshisi Ǵylym jáne joǵary bilim mınıstrligine, Tótenshe jaǵdaılar mınıstrligine jáne Seısmologııalyq baıqaý jáne zertteý ulttyq ǵylymı ortalyǵyna bul másele boıynsha saýalhat joldady. Oǵan jaýap bergen TJM óziniń vedomstvolyq baǵynysty uıymyn basqa mınıstrlikke berý máselesi qarastyrylyp jatpaǵanyn málimdedi. Bul aqparatty Ǵylym mınıstrligi de rastady.
Ǵylym komıtetiniń tóraǵasy Ǵalymjan Janqýatov óz jaýabynda seısmologııa ınstıtýtyn qaýipsizdik suraqtarymen aınalyspaıtyn vedomstvoǵa berý orynsyz ekenin atap ótti.
— «Seısmologııalyq baıqaý jáne zertteý ulttyq ǵylymı ortalyǵy» JShS memlekettiń seısmıkalyq qaýipsizdigi máselelerimen aınalysady. Jaǵdaıdy úzdiksiz seısmıkalyq baqylaý jáne jedel taldaý boıynsha strategııalyq fýnktsııalardy oryndaıdy. Atalǵan fýnktsııalar QR Ǵylym jáne joǵary bilim mınıstrliginiń quziretine kirmeıdi. Osyny eskere otyryp, «SBZUǴO» JShS-ny QR ǴJBM-niń qaramaǵyna berýdi orynsyz jáne eldiń seısmıkalyq qaýipsizdiginiń múddelerine saı kelmeıdi dep sanaımyz, - dedi ol.
Sonymen qatar Ǵylym komıtetiniń basshysy seısmologııa ınstıtýty granttyq jáne baǵdarlamalyq-nysanaly qarjylandyrý sheńberinde mınıstrlik tarapynan qarjylandyrylatynyn habarlady.
— 2023-2025 jyldarǵa arnalǵan respýblıkalyq bıýdjette «SBZUǴO» JShS-ine 2024 jylǵa — 157,287 mln teńge, 2025 jylǵa — 178 mln teńge qarjylandyrý kózdelgen, - deıdi Ǵalymjan Janqýatov.
Odan bólek seısmologııalyq ǵylym ortalyǵyna eki jobany iske asyrýǵa qarjy bólingen. Atap aıtqanda, 2024-2026 jyldarǵa arnalǵan «Qazaqstan oblystary men qalalarynyń aýmaqtarynyń seısmıkalyq qaýiptiligin qazirgi ǵylymı-ádistemelik negizde baǵalaý» jobasyna jalpy somasy 2 mlrd 314 mln teńge (2024 jyl — 764 mln teńge, 2025 jyl — 850 mln teńge, 2026 jyl — 700 mln teńge) qarastyrylǵan. Al 2023-2025 jyldarǵa arnalǵan ǵylymı joba aıasynda bıyl 26,4 mln teńge beriledi.
Agenttik saýalyna jaýap bergen seısmologııa ınstıtýty ózge mınıstrlikke aýysý boıynsha pozıtsııasyn túsindirdi.
— «SBZUǴO» memleket aıqyndaǵan basymdyqtar sheńberinde ǵylymı zertteýlerdiń sabaqtastyǵyn saqtaı otyryp jáne elimizdiń seısmıkalyq qaýipsizdigin arttyrýǵa baǵyttalǵan mindetterdi oryndaý úshin beıindi mınıstrliktermen ózara is-qımyl jasaýǵa daıyn, - delingen jaýapta.
Aıta ketken jón, seısmologııa ınstıtýty 1976 jyly Qazaq KSR Úkimetiniń qaýlysymen jáne Qazaq KSR Ǵylym akademııasy Prezıdıýmynyń qaýlysymen qurylǵan. 2023 jyly «Seısmologııa ınstıtýty» JShS men «Seısmologııalyq tájirıbelik-ádistemelik ekspedıtsııa» JShS biriktirý jolymen jarǵylyq kapıtalynda memlekettiń 100 paıyz qatysýymen «Seısmologııalyq baqylaýlar men zertteýler ulttyq ǵylymı ortalyǵy» JShS bolyp qaıta quryldy.
Eske salaıyq, buǵan deıin Tótenshe jaǵdaılar mınıstri Shyńǵys Árinov seısmologııa ınstıtýtynyń keleshegi týraly pikir bildirgen edi.