Seısmıkalyq nyǵaıtý máselesine kóńil bólmeýdiń saldary orny tolmas ókinishke soqtyrady - V.Bojko
ANA. 27 mamyr. QazAqparat /Aıdar Ospanalıev/ - Búgingi tańda respýblıka boıynsha 658 mektep, 208 aýrýhana, 87 mektepke deıingi balalarǵa arnalǵan mekemeler men 1 myń 186 qoǵamdyq ǵımarat,
432 óndiris oshaqtary seısmıkalyq jaǵynan nyǵaıtýdy qajet etedi. Bul málimetterdi Tótenshe jaǵdaılar mınıstri Vladımır Bojko búgin Parlament Senatynda ótken «Óńir» depýtattyq tobynyń tótenshe jaǵdaılar salasyndaǵy zańnamany jetildirý men aımaqtaǵy tótenshe jaǵdaılarǵa memleket tarapynan qoldanylyp otyrǵan sharalaryna qatysty uıymdastyrǵan májilisi barysynda keltirdi.
Onyń sózine qaraǵanda, qaýipti aýmaqtardaǵy basty problemalardyń biri - seısmıkalyq jaǵynan nyǵaıtýdy qajet etetin nysandar bolyp tabylady. «Qurylys jáne Turǵyn-úı kommýnaldyq sharýashylyq ister agenttiginiń málimetterinshe, seısmıkalyq jaǵynan qaýipti aımaqtardaǵy apatty jaǵdaıdaǵy turǵyn úıler sany 2 myńǵa jýyqtaıdy. Buǵan qosa, atalǵan aımaqtarda kóptegen nysandar kúrdeli jóndeýdi qajet etedi, al keıbiriniń paıdalaný merzimi bitken. Osy rette men Parlament depýtattarynan aımaqtaǵy máslıhat depýtattarymen kezdesýleri barysynda olarǵa bıýdjetti josparlaý kezinde seısmıkalyq nyǵaıtý sharalaryna qomaqty qarjy bólý qajettigin aıta júrýdi suraımyn»,-dedi mınıstr.
Sondaı-aq ol seısmıkalyq nyǵaıtý qazirgi tańda aımaqtarda asa mańyzdy emes máselelerdiń qataryna engizilip, seısmıkalyq nyǵaıtý sharalary shekten tys nashar júrip jatqandyǵyn jetkizdi.
