Seısmıkalyq qaýipti aımaqtarda qurylys salý talaptary ózgeredi

ASTANA. KAZINFORM – Seısmıkalyq qaýipti aımaqtarda qurylys jumystaryn júrgizý týraly zańnamaǵa jańa talaptar engizilip jatyr. Bul týraly Premer-Mınıstr Oljas Bektenov málim etti.

«Arnaıy qorǵaýǵa alynǵan aımaqtar men seısmıkalyq qaýipti aýdandarda turǵyn úı salý máselesine jeke toqtalǵym keledi. Bul másele ásirese Almaty qalasynda ózekti. Byltyr onda 150-den astam qurylys normasyn buzý faktileri anyqtaldy. Atap aıtqanda, taýly jerlerde, sý obektileriniń boıynda jáne erekshe qorǵalatyn aýmaqtarda qurylys salynǵan. Jańa qurylys jumystaryna qatysty ásirese seısmıkalyq aımaqtarda baqylaýdy kúsheıtý máselesi birneshe ret talqylandy», - dedi Oljas Bektenov Úkimet otyrysynda. 

Úkimet basshysy tıisti talaptar zańnamaǵa engizilip jatqanyn aıta kele, ony qatań saqtaý kerektigin tilge tıek etti. 

Aıta ketsek, O. Bektenovtiń tapsyrmasymen bıyl 1 maýsymǵa deıin qurylys obektilerine revızııa júrgiziledi. 

Sondaı-aq, Premer-Mınıstr Astanada G-Park kompanııasynyń resmı qujatsyz turǵyn úıler salyp jatqanyn aıtqan edi.