Seısmıkalyq ahýaldy baqylaý jónindegi jedel shtab 24/7 tártibinde jumys istep jatyr
ASTANA. KAZINFORM — Qazaqstan TJM basshysynyń tapsyrmasy boıynsha seısmıkalyq ahýaldy baqylaý jónindegi jedel shtab táýlik boıy jumys tártibine kóshti. Sharalar jedel den qoıýǵa jáne yqtımal tabıǵı apattardyń saldaryn azaıtýǵa baǵyttalǵan. Bul týraly QR TJM málim etti.
QR TJM Komandalyq ortalyǵynyń negizinde Tótenshe jaǵdaılar vıtse-mınıstri Batyrbek Ábdishevtiń tóraǵalyǵymen memlekettik organdar ókilderiniń qatysýymen keńes ótkizildi.
Vedomstvolar arasyndaǵy úılestirýdi arttyrý jáne azamattyq qorǵaý kúshteriniń daıyndyǵyn jaqsartý máseleleri talqylandy. TJ saldaryn joıý jónindegi is-qımyl josparlary ózektendirildi, sondaı-aq jaqyn mańdaǵy aýmaqtyq bólimshelerden qutqarýshylardyń jedel toptary daıyndyqqa keltirildi. Budan basqa, aqparat almasýdy qamtamasyz etý jáne is-qımyldardy úılestirý úshin aýmaqtyq shtabtarmen beınekonferentsııa ótkizildi. Vıtse-mınıstr apatty saldardyń aldyn alý úshin barlyq qyzmetterdiń jedeldigi men úılesimdi jumysynyń mańyzdylyǵyn atap ótti.
Vedomstvoaralyq úılestirýdi uıymdastyrý úshin vedomstvo basshylyǵynyń quramynan qurylǵan TJM jedel toby jóneltildi. Qutqarýshylar eseptoptary men arnaıy tehnıka qaýip-qaterge tez den qoıý úshin Jambyl oblysynyń seısmıkalyq qaýipti eldi mekenderine kóshirildi.
Seısmıkalyq belsendiliktiń monıtorıngin ótkizý, halyqty aqparattandyrý jáne shuǵyl qyzmetterdi yqtımal tótenshe jaǵdaılarǵa daıyndaýǵa erekshe nazar aýdaryldy. Qabyldanǵan sheshimder azamattardyń qaýipsizdigin qamtamasyz etýge jáne ónerkásip pen tirshilikti qamtamasyz etý nysandaryn qosa alǵanda, negizgi ınfraqurylymdy qorǵaýǵa baǵyttalǵan.
Mınıstrlik jaǵdaıdy baqylaýdy jalǵastyrady jáne odan ári is-qımyldar týraly ýaqtyly habardar etedi.
Buǵan deıin habarlanǵandaı, Erbol Qarashókeev jedel shtab otyrysyn ótkizgenin jazǵan bolatynbyz.