Seısenbi kúni el aýmaqtaryn tuman basyp, kóktaıǵaq bolady
ASTANA. QazAqparat - Atmosferalyq fronttardyń ótýine baılanysty 14 naýryz kúni respýblıkanyń ońtústik, ońtústik-shyǵys jáne soltústik óńirlerinde qar túrindegi jaýyn-shashyn kútiledi.
Keı jerlerde tuman, kóktaıǵaq bolyp, jel kúsheıedi, soltústikte jelmen birge jaıaý burqasyn júredi, dep habarlaıdy QazAqparat «Qazgıdromet» RMK-ǵa silteme jasap.
Aqmola oblysynyń keı jerlerinde tuman kútiledi, kúndiz jel 15-20 m/s kúsheıip, jaıaý burqasyn júredi, joldarda kóktaıǵaq bolady.
Soltústik Qazaqstan oblysynyń keı jerlerinde tuman bolyp, túnde jel 15-20 m/s artady, kúndiz jaıaý burqasyn júredi, kóktaıǵaq kútiledi.
Pavlodar oblysynyń jekelegen aýmaqtarynda kúndiz jeldiń jyldamdyǵy 15-20 m/s jetip, burqasyn soǵady.
Jambyl oblysynyń keı jerlerinde tuman, kóktaıǵaq, 15-20 m/s ekpindegi jel boljanady. Ońtústik Qazaqstan oblysynyń keı jerlerinde tuman bolyp, túnde jáne tańerteń jel 15-20 m/s kúsheıedi.
Mańǵystaý oblysynda, kúndiz Atyraý oblysynyń jekelegen jerlerinde jel 15-20 m/s artady.
Qyzylorda, Batys Qazaqstan, Aqtóbe, Qostanaı, Qaraǵandy, Shyǵys Qazaqstan oblystarynda, túnde Almaty oblysynyń keı jerlerin tuman basady.
