Seısenbi kúni bolǵan órt oqıǵalarynyń saldarynan eki adam kóz jumyp, bir adam jaraqattandy - TJM
ASTANA. Qarashanyń 25-i. QazAqparat - Keshe, respýblıka aýmaǵynda bolǵan órt oqıǵalarynyń saldarynan 2 adam kóz jumyp, bir adam kúıik jaraqattaryn aldy,
dep habarlady QazAqparatqa QR TJM-nyń baspasóz qyzmetinen.
Máselen, keshe Kókshetaý qalasy Qyzyljar aýylyndaǵy jeke turǵyn úıdiń 2 sharshy metr aýmaǵynda órt shyǵyp, ony sóndirý barysynda 84 jastaǵy keıýananyń máıiti tabyldy. Tilsiz jaý QR TJM-nyń Aqmola oblysy boıynsha departamenti órtke qarsy qyzmetiniń kúshimen 12 mınýtta aýyzdyqtaldy.
Sondaı-aq Qaraǵandy qalasy Oktıabr aýdanyndaǵy jekemenshik turǵyn úı sektorlarynyń birinen shyqqan órt 38 jastaǵy azamattyń ómirin qıyp ketti. 07 saǵat 00 mınýtta bastalyp, 40 sharshy metrge jaıylǵan tilsiz jaý oblys boıynsha Tótenshe jaǵdaılar departamenti órtke qarsy qyzmetiniń kúshimen bir jarym saǵattan keıin aýyzdyqtaldy.
Batys Qazaqstan oblysy Aqsaı qalasynda «Qarashyǵanaq saýda» JShS-nyń ónerkásiptik aımaǵyndaǵy taldaý jasaıtyn zerthanada bolǵan órttiń saldarynan 24 jastaǵy azamat kúıik jaraqatymen aýrýhanaǵa jetkizildi.
