Seıilhan Bolatbek: Qola júlde úshin óz baýyrymmen beldesýge týra keldi
ASTANA. KAZINFORM — Qazaqstandyq balýan Seıilhan Bolatbek djıý-djıtsýdan Aıchı-Nagoıada (Japonııa) ótip jatqan Azııa oıyndarynda qola medal jeńip aldy, dep habarlaıdy UOK baspasóz qyzmeti.
Jerlesimiz jarystan keıingi áserimen bólisip, qola júlde úshin ótken beldesý jaıly aıtty.
— Maǵan qoldaý kórsetken barsha qazaq jankúıerlerine alǵysymdy bildiremin. Qola júlde úshin óz baýyrymmen beldesýge týra keldi. Árıne, óte ókinishti. Alaıda jarys joly osylaı toǵystyrdy. Bul dodaǵa úlken úmitpen, tyńǵylyqty daıyndyqpen kelgen edim. Altyn medal jeńip alýdy qaladym. Ókinishke qaraı, búgin qola júlde buıyryp tur eken. Degenmen kim jeńse de, bul medal Qazaqstannyń qorjynyna túser edi. Budan bir jarym aı buryn álem chempıony atanǵan edim. Sondyqtan bul jarysqa basty favorıtterdiń biri retinde keldim. Alaıda shırek fınalda jeńilip qaldym. Qazaqstanǵa altyn medal syılaǵym kelgen edi, — dedi sportshy.
Aıta keteıik, Bolatbek Seıilhan qola medal úshin beldesýde otandasy Adlan Madaevpen kezdesti. Nátıjesinde otandyq derbı 2:0 esebimen Bolatbektiń paıdasyna sheshildi.
Osyǵan deıin Tórehan Sabyrhan Azııa oıyndarynyń altyn medalin enshilegenin jazǵanbyz.
