Seıitqazy Mataev salyqtan jaltarǵanyn moıyndady
ASTANA. QazAqparat - Astanada bıýdjet qarajatyn iri kólemde jymqyrdy, kóp jyldar boıy salyq tóleýden jaltardy degen aıyptar taǵylyp otyrǵan Seıitqazy jáne Áset Mataevtardyń isi boıynsha sot otyrysy jalǵasyp jatyr.
Seıitqazy Mataev sot zalynda salyq esebindegi kemshilikterin jáne ony tóleýden jaltarǵanyn moıyndady.
Almaty memlekettik kirister departamenti tekserisiniń aktisine sáıkes, Seıitqazy Mataevtyń salyqtyq boryshy korporatıvtik kiris salyǵy boıynsha 179,3 mln. teńgeni jáne jeke kiris salyǵy boıynsha 65,5 mln. teńgeni qurady.
«Ulttyq baspasóz klýby» qoǵamdyq birlestigi ishindegi iri qarjy aınalymyn eskergende, S.Mataev zańdy tulǵalardan Korporatıvtik kiris salyǵy boıynsha kiristerdi kórsetip 100.00 Salyq esebi formasyn, joǵaryda kórsetilgen rezıdent emes zańdy tulǵalardan korporatıvtik kiris salyǵy boıynsha kirister kórsetilgen 101.04 Salyq esebi formasyn jáne joǵaryda atalǵan jeke tulǵalardyń kiristeri kórsetilgen 200.00 Salyq esebi formasyn tapsyrýy tıis edi. Alaıda, aıyptalýshy tabysyn jasyryp, salyqtan bosatylǵan kommertsııalyq emes uıymdardyń - 130.00 Salyq esebi formasyn tapsyryp kelgen.
Búgin sot otyrysy kezinde aıyptalýshy salyqtan jaltarǵanyn moıyndap, ótken jyly qaza tapqan óziniń bas kómekshisi Aleksandr Kımasovqa kiná artyp, aqtaldy.
«Barlyq býhgalterlik istermen Aleksandr Kımasov aınalysty. Men 130.00, 100.00, 101.04 formalaryn tapsyrý kerektigin bilmedim. Salyq isterinde kemshilikter bolǵanyn moıyndaımyn», - dedi Seıitqazy Mataev.
Eske sala keteıik, Aleksandr Kımasov 2015 jyly 21 qyrkúıekte Máskeýde kóz jumdy.
