Seıitqazy Mataev 6 jylǵa bas bostandyǵynan aıyryldy
ASTANA. QazAqparat - Memleket bıýdjetinen iri kólemde aqsha jymqyrdy jáne 300 mln teńge salyqty tóleýden jaltardy, dep aıyptalǵan Seıitqazy Mataev 6 jylǵa bas bostandyǵynan aıyryldy.
Aldaǵy 6 jylyn endi ol jalpy rejımdegi kolonııada ótkizedi. Al, onyń balasy Áset Mataev 5 jylǵa bas bostandyǵynan aıyryldy.
Astanadaǵy Esil aýdandyq №2 sotynda Qazaqstan jýrnalıster odaǵynyń basqarma tóraǵasy, Ulttyq baspasóz klýbynyń prezıdenti Seıitqazy Mataevqa qatysty sot isi aıaqtaldy. Seıitqazy Mataev pen onyń balasy, «KazTAG» HAA bas dırektory Áset Mataev ózara sybaılasa otyryp, 300 mıllıon teńge jymqyrdy dep aıyptalǵan bolatyn. Buǵan qosa, tergeý sharalary Seıitqazy Mataevtyń 327 mln teńge kólemindegi salyqtan jaltaryp júrgenin anyqtaǵan bolatyn»,-dep jazady BNews.kz.
Seıitqazy Mataev QR QK 177 babynyń 4 bóliminiń B tarmaǵy boıynsha jáne QR QK 245 babynyń 3 bóliminiń, 190 baby, 4 bóliminiń 2 tarmaǵy boıynsha kináli dep tanyldy. Onyń dúnıe-múlki tárkilenip, 6 jylǵa bas bostandyǵynan aıyrý týraly jaza taǵaıyndaldy. Endi ol 6 jyl ómirin jalpy rejımdegi kolonııada ótkizedi jáne ómir boıyna memlekettik jáne kommertsııalyq uıymdardaǵy uıymdastyrýmen jáne materıaldyq jaýapkershilikpen baılanysty basshylyq qyzmetterdi atqara almaıdy.
Áset Mataev ta QR QK 194 baby, 4 bólimi, 190 baptyń 4 tarmaǵynda kórsetilgen qylmystar boıynsha kináli dep tanyldy. Atalǵan baptar negizinde «KazTAG» HAA burynǵy basshysynyń dúnıe-múlki tárkilene otyryp, 5 jylǵa bas bostandyǵynan aıyryldy. 5 jyldyq jazasyn ol jalpy rejımdegi kolonııada ótkizedi jáne oǵan da memlekettik jáne kommertsııalyq uıymdarda uıymdastyrýmen jáne materıaldyq jaýapkershilikpen baılanysty basshylyq qyzmetterdi atqarýǵa tyıym salynady.
«Aqparat jáne kommýnıkatsııalar mınıstrliginiń azamattyq talaby qanaǵattandyrylyp, Seıitqazy Mataev pen Áset Mataevtan mınıstrliktiń paıdasyna 169 mln teńge óndirilsin. 5 mln 70 myń teńge kólemindegi tólem memlekettiń paıdasyna sheshilsin. «Qazaqtelekom» AQ azamattyq talaby qanaǵattandyrylyp, Seıitqazy Mataevtan aktsıonerlik qoǵamnyń paıdasyna 143 mln 963 myń teńge óndirilip berilsin.
4,318 mln teńge kólemindegi memlekettik tólem memlekettiń paıdasyna sheshilsin. Prokýrordyń azamattyq talaby qanaǵattandyrylyp, Seıitqazy Mataevtan 2011-2015 jyldar aralyǵynda tólenbeı júrgen 216 mln 952 myń teńge kólemindegi salyǵy óndirilip, memlekettiń paıdasyna sheshilsin»,-degen sheshim shyǵardy sýdıa Aqbolat Qurmantaev.
