Seıftegi 56 mln teńgeni urlaǵan úı qyzmetshisi ustaldy

ATYRAÝ. QazAqparat – Atyraýdaǵy páter ıesiniń 56 mln teńgeni urlaǵan kúdikti áıel eki aıdan soń Shymkent qalasynda ustaldy, dep habarlaıdy QazAqparat.

Oblystyq polıtsııa departamenti baspasóz qyzmetiniń aqparatyna qaraǵanda, 28 naýryzda saǵat 00:22-de Atyraý qalasynyń 46 jastaǵy turǵyny «102» operatoryna shaǵym túsirgen.

«Shaǵymdanýshy 26-28 naýryz aralyǵynda belgisiz adamdar páterge erkin kirip, seıften 56 mln teńgesin jymqyrǵanyn aıtqan edi. Osy qylmysqa qatysty Krımınaldyq polıtsııa qyzmetkerleri kúdiktini anyqtaý úshin jedel-izdestirý sharalaryn júrgizdi», - dedi oblystyq polıtsııa departamentiniń bastyǵy Qamza Úmbetqalıev.

Onyń aıtýynsha, 27 naýryzda jábirlenýshiniń páterinen qomaqty aqsha urlaýǵa kúdikti retinde úı qyzmetshisi bolyp jumys istegen 1979 jyly týǵan áıeldi anyqtaǵan. Kúdikti Shymken qalasynda ustalǵan.

Eske sala ketelik, budan buryn Atyraýda nesıe keńsesin tonaǵan kúdikti ustalǵan bolatyn.