Seıdahmet Berdiqulov atyndaǵy syılyqtyń ıegerleri belgili boldy
ASTANA. QazAqparat - Dástúrli túrde jyl saıyn uıymdastyrylyp kele jatqan Seıdahmet Berdiqulov atyndaǵy syılyq laýreattarynyń esimderi belgili boldy, dep habarlaıdy QazAqparat Sport jáne dene shynyqtyrý isteri komıteti Ulttyq shtattyq komandalar jáne sport rezervi dırektsııasyna silteme jasap habarlady.
Komıssııa jumysynyń qorytyndysy boıynsha, Seıdahmet Berdiqulov atyndaǵy 2016 jylǵy syılyqty qazaqtildi basylymdardan Rıshad Turǵanbaev (Taldyqorǵan qalasy, «Jetisý» gazeti) pen Ǵabıt Saparbekov (Shymkent qalasy, «Ońtústik Qazaqstan» gazeti) jeńip aldy. Al orystildi tilshiler arasynda Pavel Tsybýlın (Astana qalasy, «QazSport» telearnasy) qanjyǵasyna baılady.
Júldegerlerdi marapattaý rásimi aldaǵy kúnderi belgili bolady.
Esterińizge sala keteıik, ótken jyly bul syılyqty «Úzdik jarııalanym» nomınatsııasy boıynsha «QazAqparat» halyqaralyq aqparat agenttiginiń Batys Qazaqstan oblysyndaǵy menshikti tilshisi Ǵaısaǵalı Seıtaq, úzdik televızııalyq reportaj jasaǵan «Habar» telearnasynyń jýrnalısi Qanat Bazylhan men úzdik foto jumystary úshin Alekseı Fılıppov ıelengen bolatyn.
