«Sevoran» preparatyn qoldaný máselesi qaıta qarala ma – DSM jaýaby
ASTANA. KAZINFORM – Elordadaǵy tis emhanalardyń birinde 3 jasar sábıdiń mert bolýyna baılanysty «Sevoran» preparatyn qoldaný máselesi qaıta qarala ma? Bul saýalǵa búgin Senat otyrysynan keıin Densaýlyq saqtaý vıtse-mınıstri Tımýr Sultanǵazıev jaýap berdi.
- Kez kelgen ınterventsııa, onyń ishinde tis emdeý medıtsınalyq protsedýra sanalady. Oǵan eń aldymen ata-analar óte baıyppen qaraý qajet. Tis emdeý, ásirese kishkentaı balalardyń tisin emdeý olardyń bári birdeı aýrýdy jeńil kótere bermeıtindikten kúrdelene túsedi. Osyǵan baılanysty anestezıologııalyq dáriler qoldanylady. «Sevoran» dárisi búkil álemde qoldanylady, qaýipsiz sanalady. Ol Qazaqstanda 2007 jyldan beri qoldanylyp keledi. Klınıkalyq jáne anestezıologııalyq hattamany jeke qarastyrýdy josparlap otyrǵanymyz joq. Óıtkeni, ishinde barlyq saqtyq sharasy jazylǵan, - dedi vıtse-mınıstr BAQ ókilderine arnalǵan brıfıngte.
Onyń aıtýynsha, qazirgi ýaqytta mınıstrlik tis emhanalaryna aýqymdy tekserý júrgizip jatyr.
- Qazirdiń ózinde Medıtsınalyq jáne farmatsevtıkalyq baqylaý komıteti búkil Qazaqstan boıynsha shamamen 260 tis emhanasyn tekserdi. Stomatologııalyq kómek kórsetýdi uıymdastyrý standarttaryn buzýshylyq anyqtalyp, ákimshilik jaza túri qoldanyldy. Ákimshilik aıyppuldardyń somasy shamamen 54 mln teńgeni qurady. Buǵan qosa, tek Jambyl oblysy boıynsha ǵana jedel áreket etý sharasy qabyldanyp, 10 tis emhanasynyń qyzmeti toqtatyldy. Munan bólek, komıtet Almaty qalasy, Almaty oblysynda jáne ózge de óńirlerde birqatar tis emhanasynyń qyzmetin toqtatty. Bul jumys jalǵasyp jatyr, - dedi Tımýr Sultanǵazıev.
Esterińizge sala ketsek, tis emdetken úsh jasar qyzdyń ólimine baılanysty sot qorytyndysy boıynsha stomatologııalyq klınıka basshysyna jeke úkim shyǵaryldy.
Al anestezıolog Qylmystyq kodekstiń 317-babynyń 3-bóliginde kózdelgen aıyp boıynsha kináli dep tanylyp, úsh jyl merzimge medıtsınalyq qyzmet kórsetýge baılanysty jumysty atqarý quqyǵynan aıyryldy. Sondaı-aq ol eki jylǵa bas bostandyǵynan aıyryldy.