«Sevkazenergodan» memleket paıdasyna 368 mln teńge óndirip alyndy
Soltústik Qazaqstan oblystyq prokýratýrasynyń málimetinshe, «Sevkazenergo» AQ-ǵa tekseris QR Bas prokýratýrasynyń tapsyrmasy boıynsha júrgizildi.
Petropavl prokýratýrasy ókiletti organdarmen birge júrgizgen tekseris barysynda tabıǵı monopolııalar, metrologııalyq talaptar, ónerkásip qaýipsizdigi, ekologııa, azamattyq qorǵanys, eńbek, elektrenergetıka, salyq zańnamalary salasynda zań buzýshylyqtar anyqtaldy.
Máselen kompanııa metrologııalyq tekserister ótpegen ólsheý quraldaryn paıdalanǵan, bekitilgen ınvestıtsııalyq baǵdarlama oryndalmaǵan; qaldyqtardy laqtyrý boıynsha emıssııa normatıvteri artyq bolǵan, órt qaýipsizdigi erejeleri buzylǵan; №2 jylý-elektr ortalyǵy tsehtarynda da olqylyqtar anyqtaldy; mindetti tólemder men salyq (korporatıvtik salyq tabysy, qosymsha qun salyǵy jáne salyqtyń basqa túrleri) somalaryn azaıtý faktileri anyqtalyp, bıýdjetke jalpy somasy 260 mln teńgeniń túspegendigi belgili boldy.
Barlyq anyqtalǵan zań buzýshylyqtar, sonyń ishinde - eńbek aqyny tóleý boıynsha talaptardy, qaýipsizdikti qamtamasyz etý jáne eńbekti qorǵaý erejelerin, Tabıǵı monopolııalar týraly zańdy, bıýdjetke mindetti tólemder men salyq somalaryn azaıtý, ekologııalyq zańnamamen qarastyrylǵan mindetti málimetterdi usyný boıynsha «Sevkazenergo» AQ ákimshilik jaýapkershilikke tartyldy.
Osylaısha jalpy somasy 108 mln teńge túrinde aıyppul salyndy.
Tekserý qorytyndysy boıynsha kompanııadan memlekettiń paıdasyna 368 mln teńge kóleminde soma óndirilip alyndy.
