Seýtada mıgranttar lageri órtendi: narazylyq qaqtyǵysqa ulasty
ASTANA. KAZINFORM — Ispanııanyń Seýta qalasynda mıgranttar lagerine qatysty jaǵdaı kúrt shıelenisti. Birneshe aptadan beri Marokkodan kelgen mıgranttar turyp jatqan Benıtes jaǵajaıynda narazylyq bildirýshiler olardyń zattary men múlikterin otqa laqtyra bastaǵan. Polıtsııa sherýshiler men lagerdiń arasyna tosqaýyl qoıdy. Bul týraly BILD basylymy jazdy.
Narazylyqqa qatysqandardyń arasynda fýtbol jankúıerleri bolýy múmkin. Eýropanyń birneshe ýltras-tobynyń ókilderi óz músheleriniń Ispanııa qurlyǵynan Seýtaǵa arnaıy barǵanyn málimdegen.
Bir kún buryn ondaǵan jergilikti turǵyn mıgranttarǵa azyq-túlik pen sý jetkizip bara jatqan Qyzyl Krest kólikteriniń jolyn bógeýge tyrysqan.
Polıtsııa birneshe kúnnen beri yqtımal qaqtyǵystardyń aldyn alýǵa kúsh salyp jatyr. 26 tamyz, sársenbi kúni keshke tártip saqshylary sherýshiler men mıgranttarǵa qarsy kózden jas aǵyzatyn gaz qoldanǵan. Sondaı-aq beınejazbalarda narazylyq bildirýshilerge rezeńke oq atylǵany kórinedi.
Mıgranttardyń ózderi de kúsh qoldanǵan. 27 tamyz, beısenbi kúni olar Ispanııa áskerı qyzmetshileri mingen kólikke tas jáne basqa da zattar laqtyrǵan. Sonyń saldarynan bir áskerı qyzmetshi jeńil jaraqat alǵan. Osydan keıin Marokkonyń 12 azamaty ustaldy.
Qazirgi daǵdarysqa shilde aıynyń sońynda bolǵan mıgranttardyń jappaı shekara buzýy sebep boldy. Sol kezde Marokkodan Seýtaǵa 80 myńǵa jýyq adam ótýge áreket jasaǵan. Olardyń kópshiligi teńiz arqyly júzip ótken. Resmı málimet boıynsha, keminde 96 adam qaza tapqan. Keıin mıgranttardyń basym bóligi Marokkoǵa qaıtaryldy. Alaıda birneshe myń adam áli de Seýtada qalyp otyr.
Buǵan deıin Ispanııa Ulttyq polıtsııasy derekter bazasyn tekserip, naqtylaǵannan keıin Seýtada tirkelgen kámeletke tolmaǵan mıgranttar sanyn 2168-den shamamen 1500-ge deıin qysqartqany habarlanǵan bolatyn.
Seýtadaǵy daǵdarys aıasynda Ispanııa kóshi-qon zańnamasyn reformalap jatyr.
