Seýta mańynda qaza tapqan 14 mıgranttyń máıiti Marokkodaǵy aýrýhanaǵa jetkizildi
ASTANA. KAZINFORM — Jerorta teńiziniń Afrıka jaǵalaýyndaǵy Ispanııanyń avtonomııalyq Seýta qalasyna zańsyz ótpek bolǵan kezde qaza tapqan 14 adamnyń máıiti Marokkonyń soltústigindegi Tetýan qalasyndaǵy aýrýhananyń máıithanasyna jetkizildi. Bul týraly TASS habarlady.
Muny Marokkonyń sot-medıtsınalyq qyzmeti málimdedi.
— Qazirgi ýaqytta sot-medıtsınalyq bólimge Seýta mańynda qaza tapqan 14 mıgranttyń máıiti jetkizildi. Olardyń jartysynyń jeke basy áli anyqtalǵan joq, — dep habarlady Tetýan aýrýhanasy.
Hespress aqparat portalynyń málimetinshe, qaza tapqandardyń biri — Iemen azamaty. Qajetti sot-medıtsınalyq jáne ákimshilik rásimder aıaqtalǵannan keıin eki adamnyń máıiti týystaryna tabystalǵan.
Eske sala keteıik, Ispanııanyń Seýta anklavyna zańsyz ótken shamamen 50 myń mıgranttyń jartysynan kóbi Marokkoǵa qaıtaryldy.
Soǵan qaramastan, zańsyz mıgranttardyń shaǵyn toptary Fnıdek jaǵalaýyndaǵy tolqyn bógetin aınalyp ótý nemese teńiz arqyly júzip ótý arqyly Seýtaǵa jetýdi jalǵastyryp jatyr. Aqparatqa sáıkes, olar Marokkonyń qaýipsizdik kúshteri tarapynan aıtarlyqtaı qarsylyqqa tap bolmaı otyr.
Italııa Ispanııamen aradaǵy Shengen kelisiminiń qoldanylýyn ýaqytsha toqtatyp, teńiz jáne áýe shekaralaryn japty.
