Seýta daǵdarysy: Eýroparlamentte Ispanııa úkimetine qysym kúsheıdi
ASTANA. KAZINFORM – Sársenbi kúni Brıýsseldegi Eýroparlament ǵımaratynyń aldyna 500-ge jýyq adam jınalyp, Ispanııa úkimetiniń Seýtadaǵy kóshi-qon daǵdarysyna qatysty áreketine narazylyq bildirdi. Bul týraly Euronews jazdy.
30 shildede Seýtaǵa 70 myńnan astam mıgrant kelgen. Qazir olardyń birneshe myńy ıspandyq jartylaı anklav aýmaǵynda qalyp otyr.
Narazylyq aktsııasyna ońshyl Eýropalyq halyq partııasy (EHP) men ásire ońshyl «Eýropa úshin patrıottar» qozǵalysynyń depýtattary men ókilderi qatysty. Olar Seýta men Ispanııa týlaryn ustap, Premer-mınıstr Pedro Sanchesti eldiń aýmaqtyq tutastyǵy men egemendigin qorǵaı almady dep aıyptady.
El Español basylymynyń habarlaýynsha, Ispanııanyń Kóshi-qon jáne shekara máseleleri jónindegi ulttyq ortalyǵy (CENIF) mıgranttardyń jappaı ótýin «Marokkonyń kúshtik qurylymdary úılestirgen» degen qorytyndyǵa kelgen. Alaıda Sanches Rabattyń buǵan qatysy bar ekenin dáleldeıtin derek joq ekenin málimdegen.
Madrıd ázirge oqıǵa úshin Marokkony ashyq aıyptaǵan joq. Ispanııa Іshki ister mınıstri Fernando Grande-Marlaska ulttyq polıtsııa basshylyǵyna atalǵan aqparatty tekserýdi tapsyrdy.
Ispanııanyń ásire ońshyl Vox partııasy Sanchesti elge «opasyzdyq jasady» dep aıyptap, premer-mınıstr men úkimet múshelerine qatysty qylmystyq is qozǵaýǵa múmkindik beretin Konstıtýtsııanyń 102-babyn qoldanýdy talap etip otyr.
Vox depýtattary Eýrokomıssııa tóraǵasy Ýrsýla fon der Lıaıenge, EO syrtqy saıasat qyzmetiniń basshysy Kaıa Kallasqa jáne ishki ister jónindegi eýrokomıssar Magnýs Brýnnerge hat joldady. Onda Marokkoǵa sanktsııa salý, mıgranttardyń jappaı ótýin «gıbrıdti soǵys aktisi» dep taný jáne EO men Marokko arasyndaǵy kelisimderdi ýaqytsha toqtatý usynylǵan.
Eýropalyq komıssııa Marokkonyń yqtımal qatysyna baılanysty tergeý ulttyq bılik organdarynyń quzyryndaǵy másele ekenin málimdedi.
Aıta keteıik, Marokkodan Seýtaǵa ótpek bolǵan 67 mıgrant qaza tapqan edi.
Keıin Marokkoda mıgranttardyń Seýtaǵa zańsyz kirý isine qatysty 25 adam sotqa tartyldy.
