Seýlde OANA Bas assambleıasynyń XVII otyrysy ótip jatyr

SEÝL. QazAqparat – Seýlde Azııa-Tynyq muhıty aımaǵynyń basty jańalyq agenttikteri basshylarynyń eki kúndik konferentsııasy bastaldy. Sharaǵa qatysýshylar medıakeńistikti ózgertý jáne ózara tájirıbe almasý men áriptestikti ilgeriletý máselelerin talqylaıdy, dep habarlaıdy Yonhap-qa silteme jasap.

28 eldiń 32 agenttiginiń, onyń ishinde baqylaýshy kompanııalardyń ókilderi Seýl ortalyǵynda OANA (Azııa-Tynyq muhıty aımaǵynyń jańalyqtar agenttigi uıymy) Bas assambleıasynyń 17-shi otyrysyna qatysý úshin Lotte Hotel-de bas qosty.

OANA 1961 jyly UNESCO bastamasymen óńirde jańalyqtar almasýyn ilgeriletý maqsatynda quryldy. Bas assambleıanyń otyrysy ár úsh jyl saıyn ótkiziledi. Qazir 35 eldiń 43 jańalyqtar agenttigi OANA–ǵa múshe. Olardyń qatarynda Yonhap (Ońtústik Koreıa), Xinhua (Qytaı), Kyodo (Japonııa) jáne TASS (Reseı) bar. Soltústikkoreıalyq Ortalyq jańalyqtar agenttigi de osy uıymǵa múshe, alaıda bul jyly konferentsııaǵa qatyspaıdy. Konferentsııanyń taqyryby - «Jýrnalıstıkadaǵy jańa syn-qaterler: tehnologııalyq ınnovatsııalar jáne senim máseleleri».

«Búkil álem boıynsha jańalyqtar agenttikteri jańa múmkindikterge aınalýy yqtımal teńdesi joq syn-qaterlerge tap bolyp jatady. Jasandy ıntellekt, vırtýal keńistik jáne kompıýterlik saýat redaktsııanyń bólshegine aınaldy, óıtkeni tehnologııalar óte jyldam alǵa ketip barady», – dedi «YONHAP» agenttik basshysy Cho Sýng Bý (Cho Sung-boo) konferentsııa qatysýshylaryna.

«Biz únemi jańa formada jańa kontent jasaýǵa májbúrmiz. Másele biz qandaı jańalyq taratýda emes, onyń qalaı taratý kerektiginde. Munyń qıyndyǵy barlyǵy bir mezette istelýi kerektiginde», - dedi ol.

«Túrli arnalar arqyly aqparat aǵyny tez taraıtyn ýaqytta, jańalyqtar agenttikteriniń mıssııasy qıyndp barady. Áleýmettik jeliler men mobıldi tehnologııalar usynatyn múmkindikter biz úshin ǵana emes, qalǵan barlyǵy úshin de ashyq. Óz kezeginde, bul jańalyq arnalary sanynyń jyldam ósýine ákeledi, bul bizge áser etpeı qoımaıdy», – dedi OANA prezıdenti Aslan Asanov.

Ol AZERTADJ Ázerbaıjan jańalyqtar agenttiginiń basqarma basshysy. Mádenıet, sport jáne týrızm mınıstri Pak ıAn Vý-dyń (Park Yang-woo) aıtýynsha, senimdi jáne shynaıy reportajdar jasaýǵa, qoǵamdyq senimdi jeńýge umtylý-bul álemdik qaýymdastyqtyń elge nemese qoǵamǵa qaramastan salaýatty jáne úılesimdi túrde alǵa umtylýy.

Pak ıAn Vý Seýldegi OANA Bas Assambleıasynyń otyrysy baspasózdiń medıa-ortadaǵy rólin ǵana emes, sonymen qatar burmalanǵan aqparatty eńserý joldaryn birlesip talqylaý úshin jaqsy múmkindik beretinine senim bildirdi.

Bas Assambleıada alǵash ret Yonhap agenttigi aldaǵy úsh jylǵa OANA-ǵa tóraǵalyq etýdi resmı túrde qabyldaıtyn bolady. Ońtústik Koreıalyq agenttik 77 eldiń 89 jańalyq agenttigimen yntymaqtastyq ornatqan. Agenttiktiń tilshiler qosyny 25 elde jumys isteıdi. Agenttiktiń jańalyq materıaldary 6 tilde, onyń ishinde aǵylshyn, qytaı, japon, arab tilderinde taraıdy.

Eske sala keteıik, «QazAqparat» HAA da OANA aqparat agenttikteri halyqaralyq qaýymdastyǵynyń múshesi.