Seýlde Azııalyq kóshbasshylar forýmy membasqarýdaǵy ınnovatsııalardy talqylady
ASTANA. QazAqparat - EROPA aıasynda Azııalyq kóshbasshylar forýmy memlekettik basqarýdaǵy ınnovatsııalardy talqylady, dep habarlaıdy QazAqparat.
Ońtústik Koreıa astanasy Seýl qalasynda Kóshbasshylar forýmynda Azııa memleketteriniń joǵary laýazymdy ókilderi, saıasatkerleri jáne Ekonomıkalyq yntymaqtastyq jáne damý uıymy (EYDU) hatshylyǵy ókilderi ınnovatsııalyq sheshimder men ákimshilik reformalar boıynsha ozyq tájirıbeni talqylady. Forým EROPA (Estern Regional Organization for Public Administration) Bas Assambleıasy otyrysy men jyl saıynǵy konferentsııasy aýqymynda ótti.
Astanadaǵy memlekettik qyzmet salasyndaǵy Óńirlik habtyń basqarý komıtetiniń tóraǵasy Álıhan Baımenov aımaq elderiniń memlekettik qyzmetti jetildirýdegi jetistikterine toqtala otyryp, tıimdiligin ári qaraı arttyrý baǵyttaryn kórsetti. «Birinshiden, bul - qundylyqtar. Ekinshiden, ortaq maqsatqa arnalǵan adamdar áleýetin barynsha paıdalaný men damytýǵa jaǵdaı jasaıtyn orta. Úshinshiden, júıeler men uıymdardyń beıimdelgishtigi men ıkemdiligi. Tórtinshiden, kóldeneń kommýnıkatsııalardy jaqsartý. Besinshiden, ókilettilikter, jaýapkershilikter men resýrstardyń tik jáne kóldeneń tepe-teńdigin saqtaý. Altynshydan, bul - óz uıymdarynyń mindetterin joǵary deńgeıdegi - qoǵam, el jáne Turaqty damý maqsattarymen úılestirýge múmkindik beretin kóshbasshylyq», - dedi Á.Baımenov.
Ol sonymen qatar aımaqtyq jáne jahandyq yntymaqtastyqtyń memlekettik qyzmetti damytýdaǵy róline Qazaqstan úkimetiniń bastamasy - Astana haby mysaly retinde keltirdi.
Konferentsııa barysynda Ońtústik Koreıa Respýblıkasynyń personaldy basqarý mınıstri Pan Sýk Kım Álıhan Baımenovpen kezdesýinde Habpen yntymaqtastyqtyń mańyzy men tıimdiligin atap ótti. Habtyń basqarý komıtetiniń tóraǵasy Ekonomıkalyq damý jáne yntymaqtastyq uıymynyń memlekettik qyzmetti reformalaý bólimi basshysy Edvın Laýmen de kezdesip, taraptar memlekettik basqarý salasyndaǵy birlesken zertteýler barysyn talqylady.
Eke sala ketsek, EROPA - Azııa-Tynyq muhıty aımaǵynyń on qatysýshy memleketin, 95 uıym men birlestikter, 600-ǵa jýyq jeke qatysýshylardy memlekettik basqarýdy damytý boıynsha ortaq maqsatqa jumyldyratyn halyqaralyq qaýymdastyq.
Al, Astanadaǵy Memlekettik qyzmet salasyndaǵy óńirlik hab memlekettik qyzmet boıynsha úzdiksiz tájirıbe jáne bilim almasýǵa arnalǵan ınstıtýtsıonaldy alań. Qazirgi tańda Habqa Amerıka, EO, TMD, Kavkaz jáne ASEAN elderin qosa alǵanda 38 el múshe. 
