Seýlde aýa temperatýrasy jeti jyldan beri alǵash ret 40 gradýstan asty
ASTANA. KAZINFORM – Ońtústik Koreıa astanasy Seýlde aýa temperatýrasy jeti jyldan beri alǵash ret 40°C mejesinen asty. Eldiń birneshe óńirinde de aptap ystyq rekordtyq deńgeıge jetti.
Juma kúni Seýlde aýa temperatýrasy 40°C-tan asty. Bul – 2018 jyldan beri Ońtústik Koreıa astanasynda alǵash ret tirkelgen kórsetkish.
Sońǵy ret Seýlde 40°C-tan joǵary temperatýra 2018 jylǵy 1 tamyzda baıqalǵan. Sol kezde aýa temperatýrasy rekordtyq 41,8°C-qa deıin kóterilgen.
Koreıa meteorologııalyq basqarmasynyń (KMA) málimetinshe, jergilikti ýaqytpen saǵat 15:28-de Seýldiń soltústik bóligindegi meteostantsııa 40,2°C kórsetken.
Aptap ystyq eldiń ózge óńirlerin de qamtydy. Seýldiń ońtústik-shyǵysyndaǵy Hanam qalasynyń Dokphýn aýdanynda aýa temperatýrasy 40,7°C-qa jetti.
Maýsym aıynyń basynan beri el boıynsha orta eseppen kúndizgi temperatýra 33°C jáne odan joǵary bolǵan 14,8 kún tirkelgen.
Sondaı-aq túngi aýa temperatýrasy 25°C-tan tómen túspeıtin tropıkalyq túnderdiń sany rekordtyq 13 kúnge jetti.
Buǵan deıin Ońtústik Koreıada anomaldy aptap ystyqtyń saldarynan 21 adamnyń kóz jumǵany habarlanǵan.
