Seýlde aptap ystyqqa baılanysty alǵash ret eń joǵary qaýip deńgeıi jarııalandy
ASTANA. KAZINFORM – Seýl bıligi tarıhta alǵash ret aptap ystyqqa baılanysty eń joǵary deńgeıdegi eskertý jarııalady, dep habarlaıdy Yonhap agenttigi.
Eskertý Seýldiń ońtústik-shyǵys jáne ońtústik-batys aýdandaryna taratyldy. Onyń aıasynda Kannam, Songpa, Kanso jáne Kvanakty qosa alǵanda, qalanyń 11 aýdany qamtyldy.
Mundaı eskertý seziletin aýa temperatýrasy 38 gradýsqa jetkende nemese kúndizgi eń joǵary temperatýra 39 gradýstan asqanda, sondaı-aq aptap ystyq eki kúnnen astam ýaqyt saqtalǵan jaǵdaıda jarııalanady.
Úkimettiń málimetinshe, dúısenbi kúni ǵana Seýlde ystyqtan zardap shekken taǵy 18 adam tirkeldi. Mamyr aıynyń ortasynan beri mundaı jaǵdaılardyń jalpy sany 185-ke jetip, eki adam qaıtys bolǵan.
Qala qyzmetteri turǵyndardy qorǵaý sharalaryn kúsheıtti. Kommýnaldyq qyzmetter kóshelerge sý shashyp, aýa temperatýrasyn tómendetýge kiristi. Sonymen qatar qarttar men basqa da osal toptarǵa erekshe kóńil bólinip otyr.
Turǵyndar úshin aptaptan panalaýǵa bolatyn tórt myńǵa jýyq arnaıy oryn daıyndaldy. Olardyń qatarynda qoǵamdyq ortalyqtar, qarttarǵa arnalǵan mekemeler jáne áleýmettik qoldaý ortalyqtary bar.
Eldiń Іshki ister mınıstrligi turǵyndarǵa qaýipsizdik sharalary týraly SMS-habarlamalar joldap, asa qajet bolmasa syrtqa shyqpaýǵa, ashyq aýada dene eńbeginen bas tartýǵa, kóbirek sý ishýge, salqyn jerde demalýǵa jáne jaqyndarynyń jaǵdaıyn baqylaýǵa shaqyrdy.
Eske sala ketsek, buǵan deıin Ońtústik Koreıanyń ıAnsan qalasynda aýa temperatýrasy 42,5 gradýsqa jetip, 1904 jyldan beri júrgizilip kele jatqan meteobaqylaýlar tarıhyndaǵy eń joǵary kórsetkish tirkelgenin jazdyq.
Al aptap ystyqtan týǵan qýańshylyq Ulybrıtanııada ónim kólemin azaıtyp, baǵanyń ósýine ákeldi.
