Seýl prokýratýrasy Prezıdent ákimshiliginde tintý júrgizdi
SEÝL. QazAqparat – Búgin Ońtústik Koreıa astanasynyń prokýratýrasy Ýlsan qalasynyń merin saılaý protsesine aralasý týraly isti tergeýge baılanysty Prezıdent ákimshiligi bólimsheleriniń birinde tintý júrgizdi, dep habarlaıdy QazAqparat Renhap agenttigine silteme jasap.
Seýl ortalyq okrýginiń prokýratýrasynan málim etkendeı, Prezıdent hatshylyǵy keńsesindegi tintý Seýlden ońtústik-shyǵysqa qaraı 400 shaqyrym qashyqtyqta ornalasqan qalada ótken saılaýǵa aralasý kúdigimen baılanysty.
Tintý jumystary 2018 jyly maýsymda ótken saılaýda Ýlsannyń qazirgi meri Son Chhol Honyń jeńiske jetýine kómektesken sóz baılasý týraly dálelderdi jınaýǵa baǵyttalǵan. Eki jyl buryn Ońtústik Koreıa Prezıdenti Mýn Chje Inniń jaqtasy Son Chhol Ho «Koreıa Táýelsizdigi» oppozıtsııalyq partııasynan saılaýǵa túsken burynǵy mer Kım Gı Hendi jeńgen edi.
Renhaptyń habarlaýynsha, prokýratýra qyzmetkerleri tintý barysynda Prezıdent hatshylyǵy keńsesi men jeńiske jetken mer Sonnyń arasyndaǵy baılanysty izdegen.
Burynǵy mer Kım Ýlsannyń polıtsııa basqarmasyn saılaýǵa birneshe aı qalǵanda ádeıi onyń keńsesinde tintý júrgizdi dep aıyptaǵan. Onyń artynda Prezıdent keńsesi turǵanyn málim etken.
Bul bir aıdyń ishinde Prezıdent ákimshiliginde júrgizilgen ekinshi tintý. 2019 jyldyń jeltoqsanynda prokýratýra jemqorlyq týraly taǵy bir iske baılanysty tintý júrgizgen bolatyn.
