Seýl men Phenıan shekaradaǵy shıelenisti talqylaýy múmkin
ASTANA. KAZINFORM — Ońtústik Koreıa áskerı-demarkatsııalyq syzyqtyń ótýine qatysty kelispeýshilikterdi retteý jáne shekarada bolýy múmkin qaqtyǵystardyń aldyn alý maqsatynda KHDR-men áskerı kelissózder ótkizýdi usyndy, dep habarlaıdy Yonhap.
Ońtústik Koreıa qorǵanys mınıstriniń orynbasary Kım Hon Chholdiń málimdeýinshe, Seýl men Phenıan arasynda eki eldi bólip turǵan áskerı-demarkatsııalyq syzyqtyń ornalasýyna qatysty kelispeýshilikter saqtalyp otyr.
— Ońtústik Koreıanyń Qorǵanys mınıstrligi qurlyqtaǵy áskerı-demarkatsııalyq syzyqtyń ornalasqan jerin birlesip naqtylaý, áskerı baılanys arnalaryn qalpyna keltirý jáne shekarada kezdeısoq qaqtyǵystardyń aldyn alý sharalaryn talqylaý úshin Koreıaaralyq áskerı kelissózder ótkizýdi resmı túrde usynady, — dedi ol.
Mınıstrdiń orynbasarynyń aıtýynsha, Seýl BUU qolbasshylyǵynyń qatysýymen úshjaqty kelissózder ótkizýdi de qarastyryp otyr.
Bul usynys 21 qyrkúıekte demılıtarızatsııalanǵan aımaqta mına jarylyp, Ońtústik Koreıanyń úsh áskerı qyzmetshisi zardap shekkennen keıin shıelenistiń kúsheıýi aıasynda jasaldy. Seýl oqıǵaǵa KHDR-dy jaýapty dep aıyptady, alaıda Phenıan bul aıyptaýlardy joqqa shyǵardy.
Ońtústik Koreıa tarapynyń alańdaýshylyǵyn KHDR áskerı kúshteriniń shekarany nyǵaıtýǵa baǵyttalǵan áreketteri de kúsheıtip otyr. Atap aıtqanda, shekara mańynda qorshaýlar ornatylyp, aýmaqtarǵa mına qoıylyp jatyr. Seýl shekara syzyǵyn anyqtaýdaǵy kelispeýshilikter baıqaýsyzda qarýly qaqtyǵystarǵa ákelýi múmkin dep qaýiptenedi.
Buǵan deıin Ońtústik Koreıa KHDR-men shekaradaǵy demılıtarızatsııalanǵan aımaqta qaýipti mindetterdi oryndaý úshin robottar men ushqyshsyz ushý apparattaryn paıdalanýdy usynǵany habarlanǵan bolatyn. Bul bastama 21 qyrkúıekte mına jarylyp, Ońtústik Koreıanyń úsh áskerı qyzmetshisi zardap shekkennen keıin kóterildi.
