Seýl elimizdiń úzdik on saýda seriktesiniń qataryna kiredi - Prezıdent

Memleket basshysy, eń aldymen, qonaqjaılyq tanytyp, birinshi «Ortalyq Azııa – Koreıa Respýblıkasy» sammıtin joǵary deńgeıde uıymdastyrǵan Koreıa Respýblıkasynyń Prezıdenti Lı Chje Meńge rızashylyǵyn bildirdi

– Bul dıalogtyń tarıhy tereńde. Oǵan osydan jıyrma jyl buryn koreı tarapy bastamashy bolǵan. Búginde yqpaldastyq formaty joǵary saıası deńgeıge kóterildi. Bul – san qyrly yntymaqtastyǵymyz shynaıy strategııalyq baılanystar men ózara senimge ulasqanyn aıǵaqtaıtyn sát. Búgingi sammıtti shyn máninde tarıhı ýaqıǵa dep ataýǵa bolady. Osy keremet kezdesýdi uıymdastyrýǵa Prezıdent Lı Chje Meńniń saıası erik-jiger tanytyp, jeke úles qosqanyn aıryqsha atap ótkim keledi. Koreıa Respýblıkasynyń Ortalyq Azııa memleketterimen teń dárejeli ári uzaqmerzimdi seriktestikti jolǵa qoıý nıetine kýá bolyp otyrmyz, – dedi Qasym-Jomart Toqaev.

Prezıdent qazaqstandyqtar koreı halqyna, onyń biregeı tarıhyna, dástúri men mádenıetine zor qurmetpen qarap, erekshe yqylas tanytatynyn aıtty.

– Koreıa Respýblıkasy qazirgi zamandaǵy ulttyq órleýdiń tańdaı qaqtyrarlyq tamasha úlgisin tanytty. Bilimge, ınnovatsııaǵa jáne adam kapıtalyna basymdyq berýdiń arqasynda sizder qysqa merzim ishinde jetekshi tehnologııalyq derjavalardyń qataryna qosyldyńyzdar. Bul – damylsyz eńbektiń, temirdeı tártiptiń jáne tabandylyqtyń zańdy nátıjesi. Qazaq halqy jetistikterińizge shyn máninde tánti bolyp, súıinip otyrady, – dedi Memleket basshysy.

Qasym-Jomart Toqaev kópjaqty yntymaqtastyqty damytýǵa qatysty pikirin jetkizdi.

Prezıdent basty baǵyt retinde saýda-ekonomıkalyq jáne ınvestıtsııalyq yqpaldastyq máselesin atady.

– Byltyr Ortalyq Azııa men Koreıanyń ózara saýda-sattyq kólemi alǵash ret 10 mıllıard dollardan asty. Óńirdegi taýar aınalymynyń jartysyna jýyǵy Qazaqstanǵa tıesili. Seýl elimizdiń úzdik on saýda seriktesiniń qataryna kiredi. Іri ınvestorlardyń arasynda toǵyzynshy oryn alady. Koreıadan elimizge 12 mıllıard dollardan astam ınvestıtsııa keldi. Qazaqstanda koreı kapıtalynyń úlesi bar myńnan asa birlesken kásiporyn tirkelgen. Kia, Hyundai, Doosan, Posco, Samsung, Lotte, Hanwha sekildi jetekshi kompanııalar Qazaqstan naryǵynda uzaq jyldar boıy tabysty jumys istep keledi. Qazirgi tańda ekijaqty yntymaqtastyq jańa deńgeıge kóterildi. Osy sapar aıasynda jalpy quny shamamen 19 mıllıard dollarǵa baǵalanǵan kommertsııalyq kelisimderge qol qoıyldy. Bul – ekonomıkalyq yqpaldastyǵymyzdyń qarqyny joǵary ekenine aıqyn dálel, – dedi Prezıdent.

Memleket basshysy Qazaqstannyń aldaǵy ýaqytta da koreıalyq kompanııalarǵa qajetti jaǵdaı jasaýǵa daıyn ekenin málimdedi.

Investorlardyń elimizde uzaq ýaqyt júrip-turýyn jeńildetin «Altyn Visa» baǵdarlamasy osy maqsatqa qyzmet etedi.

– Ónerkásip salasynda ekonomıkalyq yqpaldastyqty tereńdetýge aıtarlyqtaı múmkindik bar. Byltyr elimizde iske qosylǵan KIA Qazaqstan zaýyty buǵan jarqyn mysal bola alady. Kásiporyn jylyna 70 myń avtokólik shyǵarady. Óndiristiń aınalasynda tolyqqandy klaster qalyptasyp keledi. Koreıanyń tehnologııalyq qýatyn elimizdiń óndiristik áleýetimen ushtastyratyn dál osyndaı seriktestik úlgisin basqa da salalarda qoldanýǵa bolady dep oılaımyn. Bul rette Ortalyq Azııa elderi men Koreıa Respýblıkasy ónerkásip mınıstrleriniń birinshi kezdesýin ótkizý ıdeıasyn quptaımyn. Osy bastamany odan ári ilgeriletý úshin «Ortalyq Azııa – Koreıa» ónerkásip jáne tehnologııalyq damý seriktestigin qurýdy usynamyn. Atalǵan tetik aıasynda úkimetterimiz óndiris lokalızatsııasyna, tehnologııa transferine, óńirlik kooperatsııany damytýǵa jáne daıyn ónimdi úshinshi elder naryǵyna shyǵarýǵa den qoıa otyryp, birlesken mańdaıaldy jobalardyń tizimin jasaqtaı alar edi. Búgingi «Ortalyq Azııa – Koreıa Respýblıkasy» bıznes-forýmy osy úderiske eleýli úles qosatynyna senimdimin, – dedi Qasym-Jomart Toqaev.

Aıta keteıik, buǵan deıin Qasym-Jomart Toqaev «Ortalyq Azııa – Koreıa Respýblıkasy» sammıtine qatysatyny habarlandy.