Seýl – Astana reısi shuǵyl Beıjiń áýejaıyna qonýǵa májbúr boldy

ASTANA. KAZINFORM – Air Astana áýe kompanııasynyń ushaǵy tehnıkalyq aqaýǵa baılanysty Beıjiń áýejaıyna shuǵyl qondy.

Áýe kemesi 2026 jylǵy 8 qańtarda Seýl — Astana baǵytyndaǵy KC210 reısin oryndap jatqan. Kompanııanyń málimetinshe, ushaqtaǵy barlyq dárethanalardyń isten shyǵýyna baılanysty áýe kemesi Qytaı astanasyndaǵy áýejaıǵa qonǵan.

— Ushaq jergilikti ýaqyt boıynsha saǵat 09:25–te áýege kóterilip, 11:50–de sátti qondy. Qazirgi ýaqytta aqaýdy joıý úshin qajetti qosalqy bólshek kútip otyrmyz. Osyǵan baılanysty reıstiń ushýy jergilikti ýaqytpen 01:00–ge shegerildi, — dep habarlady Air Astana kompanııasynyń baspasóz qyzmeti.

Qytaı vızasy talap etilmegen jolaýshylardyń basym bóligi qonaqúıge ornalastyryldy. Al qalǵan jolaýshylar tranzıttik aımaqta qaldy. Olarǵa tamaq, sýsyn jáne jyly jamylǵy usynyldy.

Air Astana áýe kompanııasy jolaýshylardan keltirilgen qolaısyzdyq úshin keshirim surady.

Aıta keteıik, buǵan deıin de osy áýe kompanııasynyń ushaǵy osyndaı tehnıkalyq sebeppen ushý baǵytyn ózgertýge májbúr bolǵan edi.