Seýl álemniń úzdik úsh qalasynyń biri bolmaq
ASTANA. KAZINFORM — Seýl bıligi 2030 jylǵa qaraı álem qalalarynyń úzdik úshtigine kirý úshin 86,1 trln von (64,3 mlrd AQSh dollary) jumsap 100 jobany iske asyrmaq, dep habarlaıdy Yonhap.
Qala ákimshiliginiń josparyna sáıkes, turǵyndardyń ómir súrý sapasyn jaqsartýǵa jáne jańa tehnologııalardy engizýge baǵyttalǵan mańyzdy 100 bastamanyń ishinde úıden 10 mınýttyq jerde sport aımaqtaryn qurý jobasy basty oryn alady.
Sondaı-aq 500 myń jigit-qyzǵa jasandy ıntellektpen jumys isteıtin, túrli qyzmetterdi qoldanýǵa múmkindik beretin qoǵamdyq kólik bıletteri taratylady. Qazir qalada júrgizýshisiz qatynaıtyn 16 avtobýs bar, 2030 jylǵa qaraı olardyń sany 500-ge jetedi.
Turǵyn úı sektorynda Seýl baǵanyń jyldam ósý máselesin sheshý maqsatynda 2031 jylǵa qaraı 310 myń páter salyp, memlekettik baǵdarlamalar aıasynda 130 myń páter beredi.
Aıta keteıik, Ońtústik Koreıa astanasy 2025 jyly Japonııadaǵy Mori Memorial Foundation qory usynǵan Álemdik kóshbasshy qalalar ındeksinde 6-oryndy ıelengen. Sonda London, Tokıo, Nıý-Iork, Parıj jáne Sıngapýr álemniń úzdik bes qalasy atanǵan.
Mori Memorial Foundation úzdik qalalar tizimin jasarda olardy ekonomıkasyna, ǵylymyna, mádenı ómirine, turǵyndardyń ómir súrý sapasyna, qorshaǵan ortasyna jáne naryǵyna qaraı baǵalaıdy.
Eske sala keteıik, buǵan deıin Ońtústik Koreıa 2027 jyldan bastap mınıstrlikterdi Seýlden kóshiretinin habarlaǵan edik.
Nurlan Tuıaqov
