SES Qazaqstan sý qoımalary men basseınderindegi sýdyń sapasyna baqylaýdy kúsheıtti
ASTANA. QazAqparat - QR Tutynýshylar quqyǵyn qorǵaý agenttigi enterovırýstyq ınfektsııa aýrýlarynyń kóbeıýine baılanysty elimizdegi ashyq sý qoımalary men basseınderdegi sýdyń sapasyn baqylaýǵa alý jumystaryn kúsheıtti.
Bul týraly búgin Ortalyq kommýnıkatsııalar qyzmetinde ótken brıfıngte QR Tutynýshylar quqyǵyn qorǵaý agenttigi tóraǵasynyń mindetin atqarýshy Jandarbek Bekshın aıtty. «Enterovırýs basseınderden tabylǵan joq, degenmen olar káriz sýlarynan kóptep tabylýda. Bul atalǵan vırýstyń qorshaǵan ortada bar ekendiginiń janama dáleli. Sondyqtan biz júıeli jumys júrgizýdemiz», - dedi ol.
Onyń aıtýynsha, arnaıy belgilenbegen jerlerde sýǵa shomylý atalǵan vırýsty juqtyrýǵa ákep soǵady. Ótken jyly mundaı vırýs juqtyrǵandardyń sany 900-den assa, bıylǵy jarty jylda 550-den asyp otyr.
J. Bekshın atap ótkendeı, bıyl Qazaqstanda Ortalyq Azııada tuńǵysh ret molekýlıarlyq-genetıkalyq deńgeıde jumystar júrgizildi.
«Bıyl tuńǵysh ret bizdiń Astanalyq sanıtarlyq epıdemıologııalyq ekspertıza ortalyǵy molekýlıarlyq-genetıkalyq zertteý júrgizdi. Onyń nátıjeleri vırýstyń shyqqan jeri týraly tolyq málimetterge qol jetkizýimizge múmkindik týdyrdy. Endi osy derekterdi paıdalana otyryp, odan ári qandaı jumystar atqarý kerektigin belgileıtin bolamyz», - dedi ol.
