«Serpinniń» alǵashqy túlekteri kásiporyndarda jumys isteýge ázir
ASTANA. QazAqparat - «Serpin» baǵdarlamasynyń alǵashqy túlekteri elimizdiń kásiporyndarynda jumys isteı bastaıdy, dlep habarlaıdy QazAqparat QR BǴM baspasóz qyzmetine silteme jasaı otyryp.
«Serpin - 2050» jobasynyń granttaryn búgingi kúni 12 000 adam aldy. Joba qatysýshylaryna stıpendııa tólenip, jataqhana jáne jumys oryndary beriledi. Baǵdarlamanyń maqsaty - elimizdiń ońtústik óńirleriniń jastaryn kadrlar tapshylyǵy bar soltústik jáne shyǵys aımaqtarda oqytyp, jumysqa ornalastyrý.
«Almaty, Qyzylorda, Ońtústik Qazaqstan oblystarynyń jobaǵa qatysýǵa nıet bildirgen 22 jasty (6 qyz ben 16 jigit) alǵashqylardyń biri bolyp Rıdder agrarlyq-tehnıkalyq kolledji qarsy aldy. Olar tústi metaldar metallýrgııasy mamandyǵy boıynsha oqýǵa qabyldandy. Búgin kolledj túlekteri oqýyn aıaqtap otyr. Olardyń jeteýi jergilikti metallýrgııalyq keshen men ken baıytý fabrıkasyna qabyldanyp, ekeýi oqýlaryn JOO-da jalǵastyrmaq. Ákimshiliktiń jospary boıynsha, qalǵan túlekterdiń jumysqa ornalasýy men turǵyn úı jaldaýǵa sýbsıdııa bólý jaıy jyl sońyna deıin sheshilmek», - delingen habarlamada.
Baǵdarlama aıasynda oqıtyn jastarǵa arnap, oqý quraldary memlekettik tilge aýdaryldy. Óndiristik tájirıbeni ótý barysynda árbir stýdenttiń jeke tálimgeri bolǵandyqtan, jastar jumys ornyn tańdaýda qıynshylyq kórgen joq.
«Serpin» aıasynda oqyǵan týdentter jergilikti jaǵdaıda qajetti jyly kıimmen, tegin tamaqpen, jataqhanamen qamtamasyz etildi.
Eske sala ketsek, atalmysh joba 2014 jyldan bastap júzege asyrylyp keledi. 2014-2016 jyldary osy joba boıynsha 12 462 bilim granty bólindi, onyń ishinde 9 212 oryn joǵary oqý oryndaryna jáne 3 250 oryn tehnıkalyq jáne kásiptik bilim berý uıymdaryna bólindi.
Búgingi kúni joba sheńberinde 8 óńirdiń (Aqmola, Batys Qazaqstan, Qaraǵandy, Qostanaı, Pavlodar, Soltústik Qazaqstan, Shyǵys Qazaqstan oblystary, Astana qalasy) 54 kolledjinde 2 847 adam bilim alýda.
Pılottyq rejimde iske asyrylǵan joba úsh jylda jastardy mıgratsııalyq protsesterge tartýdyń tıimdi áleýmettik quralyna aınaldy. Bul rette jobaǵa qatysýshylardyń basym bóligi az qamtylǵan otbasylardan shyqqandar ekenin aıta ketý qajet. Osylaısha, búgingi kúni Ońtústik Qazaqstan, Almaty, Qyzylorda, Jambyl, Mańǵystaý oblystarynyń mektep túlekteri ortalyq jáne soltústik óńirlerde bilim alýda.
Sonymen qatar, 2017-2018 oqý jylynda joǵary jáne joǵary oqý ornynan keıingi bilim berýdiń barlyq deńgeıleri boıynsha memlekettik bilim berý tapsyrysy kólemin arttyrý kózdelip otyrǵanyn habarlaımyz.
Oqý oryndarynda joba qatysýshylarynyń shyǵarmashylyq qabiletterin damytý úshin qajetti jaǵdaılar jasalǵan, mádenı-buqaralyq is-sharalar, kóshbasshylar lagerleri ótkiziledi.
Bilim alýshylardyń óndiristik praktıkadan ótýin jáne olardyń odan ári jumysqa ornalasýyn qamtamasyz etý jumysy da jolǵa qoıylǵan. Osy maqsatta oqý oryndary óńirlerdiń kompanııalarymen jáne kásiporyndarymen memorandýmdar jáne kelisimsharttar jasasty.
Búgingi kúni joba sheńberinde memlekettik bilim berý tapsyrysy elimizdiń 22 joǵary oqý ornynda pedagogıkalyq, tehnıkalyq, aýyl sharýashylyǵy jáne medıtsına mamandyqtaryna ornalastyrylyp keledi. 2016-2017 oqý jylynda konkýrs nátıjesi boıynsha 3 162 adam grant ıegeri atandy.
