«Serpin» baǵdarlamasynyń granttary ıgerilmeı jatyr - BǴM
ASTANA. QazAqparat - QR Bilim jáne ǵylym mınıstrligi «Serpin» baǵdarlamasynyń granttaryn taratý júıesin ózgertýdi usynyp otyr, dep xabarlaıdy QazAqparat tilshisi.
QR Bilim jáne ǵylym vıtse-mınıstri Talǵat Eshenqulovtyń aıtýynsha, búginde «Serpin» baǵdarlamasyna memlekettik tapsyrystyń 10 paıyzy bólinedi. Al memlekettiń tapsyrysy artqan saıyn granttardyń sany ósedi. Osynyń nátıjesinde «Serpinge» tıesili 10 paıyzdyń kólemi de artady. Biraq atalǵan granttar tolyǵymen ıgerilmeıdi.
«Máselen, byltyr atalǵan baǵdarlama aıasynda 5 089 grant bólindi. Alaıda onyń tek 67 paıyzy ǵana ıgerildi. Sebebi «Serpinge» qatysýǵa nıet bildiretin jastar az», - dedi T.Eshenqulov búgin QR Parlament Májilisinde ótken dóńgelek ústelde.
Onyń aıtýynsha, jergilikti atqarýshy organdar qajetti mamandyqtardy jaqsy biledi. Sondyqtan grant bólýdi ákimdikterge berýge bolady. Al qarjyny tikeleı transfertpen aýdaryp otyrýǵa múmkindik bar.
«Biz «Serpin» baǵdarlamasynyń granttaryn maqsatty transfertpen jergilikti atqarýshy organdarǵa aýdarýdy usyndyq. Biraq Qarjy mınıstrligi ol bastamamyzdy qoldaǵan joq. Osy máseleni áli de talqylap, bir sheshimge kelemiz degen úmitimiz bar», - dep atap kórsetti T.Eshenqulov.
Aıta keteıik, bıyl bilim granttaryn taǵaıyndaý júıesinde ózgerister bolady. Joǵary oqý oryndaryn jan basyna qaraı qarjylandyrý júıesine basymdyq beriledi. Máselen, UBT-da joǵary upaı alǵan mektep túlegi qaı oqý ornyn tańdasa, sol jerge grant beriledi.
«Ótken jyly atalǵan bastama magıstratýrada 21 mamandyq boıynsha synaqtan ótkizilgen bolatyn. Bıyl zań normalary boıynsha magıstratýra bólimi grant taǵaıyndaýdyń jańa modeline tolyǵymen kóshedi», - deıdi T.Eshenqulov. Budan bólek, mektep túlekterine mamandyqty tańdaý jaǵy jeńildeı túsedi.
