Serpin baǵdarlamasyna bólingen memlekettik bilim granty jylda ıgerilmeıdi

ASTANA. QazAqparat – 2018 jyldan beri «Serpin» baǵdarlamasy boıynsha bólingen memlekettik bilim granty ıgerilmeı keledi. Bul jaıynda Senat depýtattarynyń saýalyna Premer-Mınıstr Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Erikti qonys aýdarý baǵdarlamasyna «Máńgilik el jastary ındýstrııaǵa!» baǵdarlamasynyń túlekteri de qatysady. Aldaǵy oqý jylynda joǵary oqý oryndary bazasynda «Serpin» baǵdarlamasy boıynsha kadrlar daıarlaýǵa 3 653 grant qaralǵan. Alaıda, 2018 jyldan bastap joǵary bilim berýdegi memlekettik granttar tolyq kólemde ıgerilmeı keledi. Máselen, 2021 jyly 5 656 grant bólinip, 2 102 adam nemese 37,2 paıyz qabyldandy. Osyǵan oraı, «Serpin» baǵdarlamasy boıynsha kvota kólemi 10 paıyzdan 5 paıyzǵa deıin qysqartyldy», - deıdi Úkimet basshysy jaýabynda.

Atalǵan baǵdarlamany iske asyrý tıimdiligine taldaý júrgizý maqsatynda jas mamandar úshin odan ári jaǵdaı jasaýǵa baǵyttalǵan usynystar ázirleý jónindegi jumys toby qurylǵan. Sondaı-aq, mynadaı is-sharalar qabyldanǵan:

1) baǵdarlamaǵa qatysýshylardy oqý oryndarynda beıimdeý, jataqhanamen, shákirtaqymen, tamaqtanýmen, jol júrý aqysymen qamtamasyz etý qyzmeti uıymdastyryldy;

2) baǵdarlamanyń iske asyrylýyn monıtorıngteý, baqylaý jáne baǵalaý júıesin avtomattandyrý jáne tsıfrlandyrý úshin aqparattyq júıeniń jumysy qamtamasyz etildi;

3) túlekterdi jumyspen qamtý jáne olarǵa járdemdesý úshin joǵary oqý oryndarynyń bazalarynda Mansap jáne kásiptik damý ortalyqtary jumys jasaıdy.

«Sonymen qatar, kvota sheginde pedagogıkalyq, medıtsınalyq, veterınarııalyq jáne aýyl sharýashylyǵy mamandyqtary boıynsha oqýǵa túsken aýyl jastarynyń jumyspen óteý merzimin úsh jyldan eki jylǵa deıin qysqartyp, barlyq jumys kúshi tapshy óńirlerde jumysty óteý múmkindigin berdi», - degen Premer-Mınıstr.