«Serpin» baǵdarlamasy boıynsha granttardyń sany nege azaıdy
ASTANA. QazAqparat - Ońtústiktiń jastaryn soltústik aımaqtarda kóptep shoǵyrlandyryp, jumys kúshi máselesin sheshýdi kózdeıtin «Serpin- 2050» baǵdarlamasy aıasynda bıyl bólingen granttardyń sany azaıdy. QazAqparat tilshisine suhbat bergen QR Bilim jáne ǵylym mınıstrligi joǵary jáne joǵary oqý ornynan keıingi bilim departamentiniń dırektory Darhan Ahmed-zakı atalǵan máseleniń sebebin túsindirip berdi.
«Endi, dál qazir aıtý qıyn. Meniń oıymsha, qazir 10 paıyzdyq mólsherleme bar. Jalpy grant sanynyń on paıyzy sol baǵdarlamaǵa bólinýi kerek degen. Ol bir jerden alynǵan san emes. Sonda búginde 31 000 granttyń on paıyzy, 3 100-deı grantty («Serpin - 2020 baǵdarlamasyna - avt.) berip otyr. Demek, jyl saıyn Qazaqstan boıynsha qansha grant bólinse, sonyń 10 paıyzy alynyp otyrady. Sondyqtan granttardyń jalpy kólemi azaıǵannan keıin anaý da azaıyp tur. Aldyńǵy jyly ondaı shekteý bolmaǵan. Biraq men ol kezde jumys istegen joqpyn. Bertin kele, shekteý úkimettiń qaýlysymen bekitildi. Meniń bilýimshe, solaı», - deıdi D.Ahmed-Zakı.
Aıta keteıik, jaqynda Astanada ótken jıyndardyń birinde «Serpin-2050» áleýmettik jobasy boıynsha respýblıkalyq úılestirý keńesiniń tóraǵasy Murat Ábenov atalǵan baǵdarlama aıasynda bólinetin bilim granttarynyń azaıyp jatqanyn jetkizip, atalǵan máseleniń sebebin túsindirip berýdi suraǵan bolatyn. Sebebi alǵashqy jyly soltústik oblystardyń oqý oryndaryna túsetin ońtústiktiń jastary úshin 2 050 grant bólinse, kelesi jyly atalǵan kórsetkish birden 6 200-ge deıin kóterilgen. Bıyl atalǵan granttardyń sany kúrt tómendep, 4 300 grantty qurady. «Granttardyń sany azaıdy. Men onyń sebebin bilmedim. Elbasy granttardy kóbeıtinder, kóbeıtinder dep jatqanda biz keri ketip jatyrmyz», - dedi M.Ábenov.
