«Serpin» baǵdarlamasy: 12 462 bilim granty bólindi
QOSTANAI. QazAqparat - Bıyl Qostanaı memlekettik pedagogıkalyq ınstıtýty (QMPI) alǵashqy «serpindik» 100-den astam túlekti ushyrady. Bul týraly oblys ákimdiginde ótken apparat májilisinde belgili boldy, dep habarlaıdy QazAqparat.
Jıynda aıtylǵandaı, bul joba oblysta 2014 jyldan bastap júzege asyrylyp keledi. 2014-2016 jyldary «Serpin-2050» baǵdarlamasyna 12 462 bilim granty bólindi, onyń ishinde 1997 stýdent Qostanaı oblysynda oqıdy. 2017-2018 oqý jylynda QMPI-diń 121 túlegi dıplom almaq.
«Serpin» boıynsha bizdiń ınstıtýtta 413 stýdent oqıdy. Olardyń 280-i ońtústik óńirlerden kelgen. Oqý oryndarynda joba qatysýshylarynyń shyǵarmashylyq qabiletterin damytý úshin qajetti jaǵdaılar jasalǵan, mádenı-buqaralyq is-sharalar ótkiziledi. 128 stýdent joǵarǵy stıpendııa alsa, taǵy 5-eýi prezıdenttik stıpendııaǵa ıe bolǵan. Bilim alýshylardyń óndiristik praktıkadan ótýin jáne olardyń odan ári jumysqa ornalasýyn qamtamasyz etý jumysy da jolǵa qoıylǵan. Osy maqsatta biz óńirlerdiń kompanııalarymen jáne kásiporyndarymen kelisimsharttar jasastyq. Oblystyq bilim basqarmasy «serpindik» stýdentterge 74 bos oryn usyndy. Onyń 33-i - aýylda, al 41-i - qalada», - dedi QMPI rektory Erkin Ábil.
Rektordyń sózinshe, qalada jumys isteıtinder úshin baspana máselesi týyndap otyr. Al oblys ákimi Arhımed Muhambetov jastardy aýylǵa shaqyrdy.
«Qazir bári qalada qalǵysy keledi. Bul durys emes. Qalada ómirý súrý áldeqaıda qymbatqa túsedi. Oblysta respýblıkalyq mańyzy bar joldarǵa jaqyn ornalasqan aýyldar kóp. Máselen, Qarasýda 100-120 sharshy metr bolatyn keń, yńǵaıly úıler bar. Mal sharýashylyǵymen aınalysýǵa bolady. Qazir memleket te jaqsy jaǵdaı jasap otyr. Menińshe, ár aýylǵa 3-4 jas mamannan bolý qajet», - dedi aımaq basshysy.
