Serilik ánder nekege májbúrleý, stalkıng týraly zańdarǵa qaıshy ma – vıtse-mınıstr jaýaby
ASTANA. KAZINFORM – Májilistiń jalpy otyrysynda óner týyndylaryndaǵy alyp qashý dástúriniń kórinisi bar elementterdiń zańǵa sáıkestigi týraly daý týyndady.
- Ulttyq arnadan keshe kıno bolyp jatyr, serıal. «Kónbeseń, alyp qashamyn» deıdi. «Eshteńe qylmaıdy, meni de alyp qashqan. Aman-esen júrmiz», - deıdi. Bul ne sonda? Ulttyq arna memleket saıasatyna qarsy ma degen oı týyndaıdy ǵoı. Mádenıet mınıstrligi men Іshki ister mınıstrligi bir-birin estimeıdi me degen oı týyndaıdy. Biz zań shyǵaramyz. Ol zańdy mensinbeı, kúlki qylǵan durys emes dep oılaımyn, - dedi Murat Ábenov.
Mádenıet jáne aqparat mınıstriniń orynbasary Qanat Ysqaqov depýtat keltirgen faktini tekserip, rastalsa aqparat resýrsynan shara qoldanylatynyn aıtty.
Biraq bul máselege taǵy bir depýtat Rınat Zaıyt qarsy ýáj aıtty.
- Áriptesterimniń suraqtarynan mende de suraq týyndap otyr. Myna jerde men túsinbeıtin bir áńgimeler shyqty. Kórkem shyǵarma degen bolady. Qazir sizder qyzdy-qyzdymen
«Men jasymda jigitter toptan astym,
Bir túnde segiz qyzdy alyp qashtym», - dep án aıtqandardy sottap júrmeımiz be?
«Eger meni shyn súıseń, asyl erkem,
Erteń keshke daıyn bol qashýyńa-aı», - degen halyq áni bar. Bul qalaı bolady?... Erteń folklorymyzdan aıyrylyp, Aqseleý (Seıdimbek) marqumnyń «Beıpil sózderin» oqı almaı qalyp júrmeıik, - dedi depýtat.
Áńgimege Májilis tóraǵasy Erlan Qoshanov aralasyp:
- Ondaı án aıtý úshin Imanjúsip bolý kerek qoı, - dep mysqyldady.
Al vıtse-mınıstr Qanat Ysqaqov nekege májbúrleý áreketterine, stalkıngke qarsy qabyldanǵan zańdardyń folklorǵa tıgizetin keri áseri bolmaıtynyn, Konstıtýtsııada tsenzýraǵa tyıym salynǵanyn aıtty.
Eske salsaq, bıyl jazda nekege turýǵa májbúrleý men «dropperlik» úshin qylmystyq jaýaptylyq engizilgen edi.