Serikbaı Nurjanov Qonaev qalasy máslıhatynyń tóraǵasy bolyp saılandy

QONAEV. KAZINFORM – Qonaev qalasy máslıhatynyń depýtattary biraýyzdan jańa tóraǵany saılady. 

Qonaevta qalalyq máslıhattyń kezekten tys sessııasy ótti. Ákimdiktiń baspasóz qyzmeti habarlaǵandaı, kún tártibinde máslıhattyń tóraǵasyn saılaý máselesi qaraldy. 

Depýta Imanǵalı Igesenov tóraǵa laýazymyna tájirıbeli maman ári basshy Serikbaı Nurjanovty usyndy. Máslıhat basshysynyń laýazymyn ýaqytsha atqarýshy Bolat Sadyqov usynysty daýysqa saldy. Nátıjesinde halyq qalaýlylary biraýyzdan Serikbaı Nurjanovty qalalyq máslıhattyń jańa tóraǵasy etip saılady.

«Senim bildirgenderińizge kóp raqmet. Sońǵy kezderi máslıhat jumysynda sheshilmegen máseleler týyndap jatyr. Sondaı-aq qaladaǵy kókeıtesti problemalardyń túıinin tarqatý úshin barshańyzdy aýyzbirshilikke shaqyramyn. Qaırat Ahmettaevqa alǵysymdy bildire otyryp, sáttilik tileımin», - dedi Serikbaı Nurjanov.

Aıta keteıik, buǵan deıin VIII shaqyrylymnyń depýtattary máslıhattyń burynǵy tóraǵasy Qaırat Ahmettaevqa qatysty senimsizdik votýmyn jarııalaǵan bolatyn. Sondaı-aq qoǵam ókilderi máslıhat apparatyna baılanysty syn aıtqan edi. 

Osy aptada Almaty oblysynyń ákimi Marat Sultanǵazıevtiń suhbaty shyqqan edi, myna jerden oqı alasyz.