Serik Jumanǵarın Vetnam ókiline elektromobılderge arnalǵan batareıalardy shyǵarýdy usyndy

ASTANA. KAZINFORM - Qazaqstan Premer-Mınıstriniń orynbasary Serik Jumanǵarın Vetnam ónerkásip jáne saýda mınıstri Ngýen Hong Zıenmen kezdesti, dep habarlaıdy Úkimettiń baspasóz qyzmeti.

«Vetnam Qazaqstan úshin Azııadaǵy mańyzdy seriktesterdiń biri. QR Prezıdentiniń byltyr tamyzdaǵy Vetnamǵa resmı saparynyń qorytyndysy boıynsha biz ekijaqty qarym-qatynastarymyzdyń joǵary belsendiligin atap ótemiz: taýar aınalymy 85% -ǵa ósip, shamamen $1 mlrd-qa jetti. Elderimiz arasynda aptasyna 13 áýe reısi oryndalady. Ushý geografııasyn keńeıtýge daıynbyz»,— dep atap ótti Serik Jumanǵarın.

Sonymen qatar vıtse-premer vetnamdyq kompanııalardy Transkaspıı halyqaralyq kólik baǵytynyń múmkindikterin zertteýge shaqyrdy. Bul vetnamdyq eksportqa teńiz baǵyttaryna qaraǵanda shyǵystan batysqa qaraı 3-4 ese jyldam júrýge múmkindik beredi, bul shyǵyndardy aıtarlyqtaı azaıtady.

«Biz THKB Azııa men Eýropa arasyndaǵy eń ońtaıly baǵyt dep esepteımiz. Sondaı-aq Lıanıýngan teńiz portyndaǵy Qazaqstan-Qytaı termınalynyń jáne Sıan qurǵaq portynyń qýatyn iske qosýdy usynamyz», — dedi ol.

Kezdesý barysynda taraptar sırek kezdesetin metaldardy óndirý jáne óńdeý salasyndaǵy yntymaqtastyq múmkindikterin talqylady. Vetnam delegatsııasyna elektromobılderge arnalǵan lıtıı-ıon batareıalaryn óndirý úshin Qazaqstandaǵy iri lıtıı ken oryndaryna nazar aýdarýǵa usynyldy, bul Qazaqstannyń joǵary tehnologııalyq sektorynyń ósýine, al vetnamdyq avtoóndirýshilerge ózderiniń básekelestik artyqshylyqtaryn saqtaýǵa múmkindik beredi.