Serik Jumanǵarın: USAID jaǵdaıynyń bizge eshqandaı qatysy joq
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın USAID uıymyna qatysty pikir aıtty
- USAID-tiń jaǵdaıy - ol AQSh-tyń ishki saıasaty. Olar qandaı sheshim qabyldaıdy, solaı bolady. Onyń bizge eshqandaı qatysy joq», - dedi S.Jumanǵarın Senattyń jalpy otyrysynan keıin tilshiler suraǵyna jaýap bere otyryp.
Buǵan deıin AQSh USAID-ti nege taratpaq bolǵanyn jazǵan edik.
AQSh-tyń halyqaralyq damý agenttiginiń (aǵyl. United States Agency for International Development, USAID) negizgi mıssııasy – sheteldik gýmanıtarlyq kómekti úılestirý. Naqtyraq aıtsaq, ózge memlekettermen birlese otyryp áleýmettik-ekonomıkalyq baǵdarlamalar ázirleıdi.
Jaqynda QR Saýda jáne ıntegratsııa vıtse-mınıstri Qaırat Tórebaev Májilis kýlýarynda AQSh Halyqaralyq damý agenttiginiń jumysyn toqtatýy Qazaqstanda bastalyp ketken jobalarǵa qalaı áser etip jatqany týraly pikir bildirdi.
Al Májilis depýtaty Magerram Magerramov elimizge sheteldik demeýshiler bóletin qarjyǵa aýdıt júrgizip, barlyq esep-qısabyn halyqqa jarııalaý kerek dep otyr.